რუსეთის ფედერაციის მიერ ოკუპირებულ აფხაზეთსა და ცხინვალის რეგიონში ადამიანის უფლებების უხეში დარღვევისა და ოთხოზორია-ტატუნაშვილის სიის შესახებ რეზოლუციის კენჭისყრა პარლამენტში ერთი საათის წინ დასრულდა.

რეზოლუციის პროექტისთვის კენჭის საყრელად რეგისტრაცია 110-მა დეპუტატმა გაიარა. რეზოლუციას მხარი 106-მა დაუჭირა, ოთხმა დეპუტატმა კი თავი შეიკავა. აქედან სამი ნაციონალური მოძრაობის დეპუტატია. მეოთხე დეპუტატი, რომელმაც თავი შეიკავა, უმრავლესობის წევრი ლევან კობერიძეა. ის ამბობს, რომ რეზოლუციასთან დაკავშირებით თავისი მოსაზრებები აქვს.

ტატუნაშვილთან დაკავშირებული რეზოლუციის პროექტის განხილვას ნაციონალური მოძრაობიდან ესწრებოდნენ სალომე სამადაშვილი, რომან გოცირიძე და თინა ბოკუჩავა.

დეპუტატმა რომან გოცირიძემ On.ge-ს უთხრა, რომ საპარლამენტო უმრავლესობამ ნაციონალური მოძრაობის სამი შენიშვნიდან ორი არ გაითვალისწინა და ეს გახდა კენჭისტრაში მონაწილეობაზე უარის თქმით მიზეზი.

"ჩვენ გადაწყვეტილებას მივიღებდით იმ შემთხვევაში, თუ ჩვენი შენიშვნები იქნებოდა გათვალისწინებული. ჩვენ არ გვინდა მივცეთ წინააღმდეგი ხმა, მაგრამ არც იმის თქმა გვინდა, რომ რეზოლუციას მხარი დავუჭირეთ", - განაცხადა რომან გოცირიძემ.

კენჭისყრაში მონაწილეობა არ მიუღია პატრიოტთა ალიანსს.

საქართველოს პარლამენტმა რუსეთის ფედერაციის მიერ ოკუპირებულ აფხაზეთსა და ცხინვალის რეგიონში ადამიანის უფლებების უხეში დარღვევისა და ოთხოზორია-ტატუნაშვილის სიის შესახებ რეზოლუცია 106 ხმით დაამტკიცა. რეზოლუციის საწინააღმდეგო ხმა არც ერთ დეპუტატს არ მიუცია, 4 დეპუტატს კი კენჭისყრაში მონაწილეობა არ მიუღია.