რადიო თავისუფლების ინფორმაციით, 1-ელ აპრილს, თბილისის საერთაშორისო აეროპორტში, დაახლოებით ნახევარი საათით, აშშ-ის სამხედრო-საჰაერო ძალების თვითმფრინავი დაეშვა.

სამხედრო თვითმფრინავი თბილისში გერმანიიდან გამოფრინდა, თბილისიდან კი სამხრეთის მიმართულებით დაიძრა.

საქართველოში აშშ-ის საელჩო, რადიო თავისუფლებას განუცხადა, რომ "თვითმფრინავების ასეთი გადაადგილება აშშ-ის სამხედრო სატრანსპორტო ოპერაციების ნორმალური ნაწილია და რეგულარულად ხორციელდება პარტნიორებთან კოორდინაციით. ისინი არ არის დაკავშირებული რაიმე რეგიონულ დაძაბულობასთან".

თვითმფრინავების თვალყურის სადევნებელ საიტის, Flightradar24-ის ინფორმაციით, გერმანიის ქალაქ რამშტაინში აშშ-ის სამხედრო ავიაბაზიდან თბილისში 15:30 საათისთვის დაეშვა, 16:03 საათზე კი აეროპორტი დატოვა. Flightradar24-ზე სამხედრო თვითმფრინავის მიმართულება მითითებული არ იყო. მედიასაშუალების ინფორმაციით, მან გადაკვეთა სომხეთის საჰაერო სივრცე და თურქეთის ტერიტორიაზე შევიდა. ამის შემდეგ თვითმფრინავი Flightradar24-ის რადარიდან გაქრა.