პოლონეთის პრემიერმინისტრი დონალდ ტუსკი ჟურნალისტური გამოძიების ფარგლებში გავრცელებულ აუდიოჩანაწერს ეხმაურება, რომელიც უნგრეთის საგარეო საქმეთა მინისტრის, პეტერ სიიარტოსა და რუსეთის საგარეო საქმეთა მინისტრის, სერგეი ლავროვს შორის სატელეფონო საუბარს ასახავს.

დონალდ ტუსკის თქმით, ეს იყო დადასტურება, თუ რამდენად არის უნგრეთი მოსკოვზე პოლიტიკურად დამოკიდებული.

"რთულია რამე უფრო გულისამრევი წარმოიდგინო" — განაცხადა პოლონეთის პრემიერმინისტრმა პრესკონფერენციაზე.

მისი თქმით, ვიქტორ ორბანის მთავრობამ ფაქტობრივად დატოვა ევროკავშირი, თუმცა ეს უნგრელ ხალხს არ ეხება.

"რაც მოვისმინეთ, რასაც უკვე ვეჭვობდით, ვიქტორ ორბანის მთავრობისა და მისი საგარეო საქმეთა მინისტრის, ბატონი სიიარტოს მოსკოვზე ღრმად შემაშფოთებელი პოლიტიკური დამოკიდებულების უბრალოდ დადასტურებაა. დიდი ხანია არ მომისმენია, ან თუ ოდესმე მომისმენია ასეთი გულდასაწყვეტი რამ. რაც ამ ჩანაწერებმა გამოავლინა უფრო მეტია ვიდრე უბრალოდ ბუდაპეშტის მოსკოვზე პოლიტიკური დამოკიდებულება. ამან გამოააშკარავა რეალურად რამდენად მიუღებელი და უცნაურია ეს ურთიერთობები. ევროპული ქვეყნის ევროკავშირის წევრის საგარეო საქმეთა მინისტრი ანგარიშს აბარებს რუსეთის საგარეო საქმეთა მინისტრს დავალების შესრულებაზე და მოთმინებას სთხოვს, ვინაიდან იცის, რომ კიდევ რამდენიმე დავალება უნდა შეასრულოს. რთულია ვინმემ რამე უფრო გულისამრევი წარმოიდგინოს. სრულიად მადის კვალიფიცირებებია", — განაცხადა მან პრესკონფერენციაზე.

The Insider-ის ცნობით, 2024 წლის 30 აგვისტოს რუსეთის საგარეო საქმეთა მინისტრმა სერგეი ლავროვმა უნგრეთის საგარეო საქმეთა მინისტრს პეტერ სიიარტოს სატელეფონო ზარით სთხოვა, ლობირება გაეწია ბიზნესმენი ალიშერ უსმანოვის დის, გულბაჰორ ისმაილოვას, ევროკავშირის სანქციების სიიდან ამოღებისთვის.

"რეალპოლიტიკა" წერს, რომ გამოცემისა და მისი საგამოძიებო პარტნიორების მიერ მოპოვებული აუდიოჩანაწერებისა და ტრანსკრიპტების მიხედვით, უნგრეთის საგარეო საქმეთა მინისტრ პეტერ სიიარტოსა და რუსეთის საგარეო საქმეთა მინისტრ სერგეი ლავროვს შორის არსებული "ცხელი ხაზი" მოსკოვს ევროკავშირის კრიტიკულ საკითხებზე სტრატეგიულ ინფორმაციას აწვდიდა.

სატელეფონო საუბრის ჩანაწერი:

სერგეი ლავროვი: მისმინე, ალიშერის თხოვნით გირეკავ. მან მთხოვა შეგახსენო, რომ მის დასთან დაკავშირებით რაღაცას აკეთებდი.

პეტერ სიიარტო: ქალბატონ ისმაილოვაზე ამბობთ?

სერგეი ლავროვი: დიახ.

პეტერ სიიარტო: დიახ, რა თქმა უნდა. საქმე შემდეგნაირადაა: სლოვაკებთან ერთად ევროკავშირში შეგვაქვს წინადადება მისი სიიდან ამოღების შესახებ. მას მომავალ კვირას წარვადგენთ და რადგან ახალი განხილვის პერიოდი იწყება, საკითხი დღის წესრიგში დადგება. ჩვენ ყველაფერს გავაკეთებთ, რომ ის სიიდან ამოვიყვანოთ.

სერგეი ლავროვი: დიდი მადლობა. ის მართლაც ძალიან კმაყოფილი დარჩება. სერიოზულად ნერვიულობს თავის დაზე, თავადაც გესმით... ჩვენ კი ძალიან ვაფასებთ თქვენს მხარდაჭერას და თქვენს ბრძოლას თანასწორობისთვის ყველა სფეროში.