ბოსტონის აკვარიუმში მცხოვრები სელაპი, რეგეა, ინტერნეტის ნამდვილ სენსაციად იქცა. გასულ კვირებში, სოციალურ ქსელებში რეგეას ვიდეოები გავრცელდა, რომლებშიც ის თავის რეზინის იხვს ეხუტება.

New England Aquarium-ის მიერ ინსტაგრამზე გამოქვეყნებულ პოსტში, 33 წლის სელაპი, რეგეა, თავის სათამაშოს მისდევს და კოცნის. ხოლო იქვე მყოფი ტრენერები სათამაშოს სწორ მიმართულებას აძლევენ, რათა დინებამ შორს არ წაიღოს.

ფოტო: New England Aquarium

თუმცა, როგორც რეგეის ტრენერებმა Associated Press-თან საუბრისას აღნიშნეს, იხვი სელაპისთვის უბრალოდ სათამაშო არ არის, რადგან ის რეგეის განვითარებაში მნიშვნელოვან როლს ასრულებს.

აკვარიუმის მენეჯერმა, რებეკა მილერმა, აღნიშნა, რომ ტრენერები რეგეის სათამაშოს მეშვეობით სხვადასხვა თამაშს ასწავლიან, რაც აუცილებელია იმისთვის, რომ მისი ყოველდღიურობა ნაყოფიერი იყოს.

"სელაპს შეუძლია, თავისი მახვილი მხედველობით გარემო დაათვალიეროს, იპოვოს ახალი ნივთები და სხვა შეგრძნებებითაც შეისწავლოს ისინი", — ამბობს ის — "ეს ჩვენი ცხოველების გავარჯიშების მშვენიერი გზაა. გვინდა, მათთვის ახალი გამოწვევები შევქმნათ და საშუალება მივცეთ, პრობლემის გადაჭრის უნარები გამოიმუშაონ".

აკვარიუმის თანამშრომლების განმარტებით, სათამაშო იხვი მათი შემეცნებითი თამაშის ნაწილია. რეგეი გაწვრთნილია იმაში, რომ თავად მოძებნოს იხვი. ასეთი თამაშები სელაპს ეხმარება, რომ განასხვაოს სხვადასხვა ობიექტი ერთმანეთისგან.

აღსანიშნავია ისიც, რომ ველურ ბუნებაში ატლანტის სელაპები ჩვეულებრივ 25-30 წელს ცოცხლობენ, თუმცა აკვარიუმში, სწორი მოვლისა და მუდმივი გონებრივი სტიმულაციის წყალობით, ისინი ხშირად 30-დან 40 წელსაც აღწევენ. თავად რეგეი 33 წლისაა და ის სწორედ ამ აკვარიუმში დაიბადა.

"რეგეი ძალიან მშვიდი და აუღელვებელია. გარემოს მარტივად ეგუება და უყვარს ადამიანებისგან ყურადღების მიღება", — ამბობს მისი ტრენერი, ლიზ უეითი.