რუსთავი 2-ის ტელეწამყვანი, გიორგი გაბუნია ამბობს, რომ მუქარის გამო, იძულებულია, დაცვის თანხლებით გადაადგილდეს. გაბუნიას მისამართით გავრცელებულ მუქარის შემცველ განცხადებებზე შინაგან საქმეთა სამინისტრომ გამოძიება დაიწყო.

"მიდის მუშაობა იმაზე, რომ გამომძიებლებმა ზუსტად გაარკვიონ, ვინ არის მუქარის შემცველი წერილის ავტორი. მე წარმოდგენა არ მაქვს. გამომძიებლებს აინტერესებდათ, რა ზემოქმედება იქონია ჩემზე ამ წერილმა და ფაქტია, რომ მათ შორის ამ წერილიდან გამომდინარე, მე მიწევს, მუდმივი თანხლებით გადაადგილება, დაცვასთან ერთად, სპეციალურ მძღოლთან ერთად, მათ შორის უკვე არა მხოლოდ სამსახურებრივი მოვალეობის შესრულების დროს, არამედ სახლშიც კი, რადგან ამ მუქარის წერილში კონკრეტულად არის ნახსენები, რომ მათ იციან, მე სად ვცხოვრობ. არ არის დაკონკრეტებული, მე რა ტიპის ანგარიშსწორებით მემუქრებიან ისინი, მაგრამ მე ვუთხარი გამომძიებლებს, რომ ეს შეიძლება იყოს ნებისმიერი ფორმის შურისძიება, ამიტომ, მე იძულებული ვარ, რომ ჩემს უსაფრთხოებაზე განსაკუთრებულად ვიზრუნო"

19 მარტს რუსთავი 2-ის ოფისის ეზოში შენობასთან შეკრებილმა ნეონაცისტური დაჯგუფების, ქართული მარშის წევრებმა, ალყა შემოარტყეს ავტომობილს, რომელშიც ჟურნალისტი გიორგი გაბუნია და არხის იურისტი თამთა მურადაშვილი იმყოფებოდნენ. მათ სიტყვიერი შეურაცხყოფა მიაყენეს გიორგი გაბუნიას და შენობაში შესვლის შესაძლებლობა არ მისცეს.

ქართული მარშის წევრებს მიაჩნიათ, რომ გიორგი გაბუნიამ მათ "რელიგიურ გრძნობებს" შეურაცხყოფა მიაყენა, როცა 18 მარტს გადაცემა P.S.-ში იესო ქრისტეს ჯვარცმაზე ისაუბრა.

არხის გენერალურმა დირექტორმა, ნიკა გვარამიამ განაცხადა, რომ რელიგიური გრძნობების შელახვის გამო გაბუნიამ საყვედური მიიღო. გიორგი გაბუნიამ განაცხადა, რომ ქრისტეზე განცხადების გამო ის ბოდიშის მოხდას არ აპირებს.