ახალგორის გამგებლი ნუგზარ თინიკაშვილი On.ge-სთან საუბრისას ამბობს, რომ არჩილ ტატუნაშვილის ცხედარს სახესა და ხელებზე ძალადობის კვალი აღენიშნება.

მისი თქმით, ექსპერტიზის დასკვნა ორ კვირაში იქნება და ყველა კითხვას პასუხი გაეცემა.

"აშკარაა, რომ ტატუნაშვილის ცხედარს ხელებსა და სახეზე გარკვეული ძალადობის კვალი აღენიშნება", - ამბობს ნუგზარ თინიკაშვილი.

გამგებლის ინფორმაციით, არჩილ ტატუნაშვილს 24 მარტს, ქანდის სასაფლაოზე შაბათს დაკრძალავენ.

ოკუპირებული ცხინვალში მოკლული არჩილ ტატუნაშვილის ცხედარი 26 დღიანი ლოდინის შემდეგ, საქართველოს ხელისუფლებას ოც მარტს გადასცეს. ცხედარს შვიდ საათზე მეტი დროის განმავლობაში ექსპერტიზა უტარდებოდა.

არჩილ ტატუნაშვილი თითქმის ერთი თვის წინ, 22 თებერვალს ცხინვალის ციხეში გარდაიცვალა.