საქმიანი დილისა და ბიზნესკონტაქტის შემოქმედებითი ჯგუფი აცხადებს, რომ წყვეტს თანამშრომლობას შპს სტუდია მაესტროსთან,- ამის შესახებ ინფორმაციას ტელევიზია ავრცელებს. მათი თქმით, მომავალში ურთიერთობას ტელეპროდუქციის წარმოებაზე გააგრძელებს მხოლოდ კონტრაქტის საფუძველზე.

“ჩვენ ვიცავდით და მომავალშიც დავიცავთ პარტნიორულ ურთიერთობებს. ეს ურთიერთობები ყოველთვის ემყარებოდა საქმიან პარიტეტს, რაც თავისთავად ნიშნავს არსებული კანონმდებლობის უცილობელ დაცვას და პარტნიორული ურთიერთობების პატივისცემას. ჩვენი შემოქმედებითი ჯგუფი სრულ პასუხისმგებლობას იღებს მაესტროს ეთერში ჩვენს მიერ ნაწარმოებ პროდუქციაზე და მის შინაარსზე, რომელიც ყველა საერთაშორისო თუ ადგილობრივი არასამთავრობო, ბიზნეს საზოგადობის მხრიდან აღიარებული როგორც ყველაზე მაღალ პროფესიული და დაბალანსებული სატელევიზიო პროდუქტი. ასე იყო თითქმის ბოლო ორი წლის მანძილზე მაესტროზე და ასე იქნება მომავალშიც. იქნება ჩვენი პასუხისმგებლობით და ერთიანობით. გუნდი, კიდევ არაერთ სატელევიზიო პროდუქტს შესთავაზებს მაყურებელს! მანამდე კი ვადასტურებთ ჩვენს ერთიან პოზიციას და გპირდებით, რომ საქმიანი დილიდან გვიან საღამომდე ვრჩებით ერთმანეთთან ბიზნესკონტაქტზე!" - ნათქვამია მაესტროს განცხადებაში.

საჯარო რეესტრის 2016 წლის 1 თებერვლის ამონაწერის მიხედვით, სტუდია მაესტროს საკონტროლო პაკეტის 55%-ის მფლობელი გიორგი გაჩეჩილაძე გახდა. 4 თებერვალს, კომპანიის პარტნიორთა კრებაზე ბაია გაბადაძე დირექტორის თანამდებობიდან გადააყენეს. გიორგი გაჩეჩილაძემ ახალ დირექტორად თავისი ძმა, ლევან გაჩეჩილაძე წარადგინა.