შინაგან საქმეთა სამინისტროს განცხადებით, 2 მარტიდან დღემდე, პოლიციამ შიდა ქართლში, სამცხე-ჯავახეთში, გურიასა და ქვემო ქართლში, ოჯახში ძალადობის ბრალდებით, 11 პირი დააკავა.

შინაგან საქმეთა სამინისტროს განცხადებით, 1988 წელს დაბადებული პირი ოჯახში ძალადობისა და თვითმკვლელობის ცდამდე მიყვანის ბრალდებით, გორში დააკავეს. დანაშაული 1 წლამდე ვადით თავისუფლების აღკვეთას ითვალისწინებს.

გამოძიების ვერსიით, ბრალდებულმა ცოლს სიტყვიერი და ფიზიკური შეურაცხყოფა მიაყენა, მან ცოლი ყელისა და მაჯის არეში ბასრი საგნით დაჭრა. გამოძიება ოჯახში ძალადობისა და თვითმკვლელობის ცდამდე მიყვანის ფაქტებზე მიმდინარეობს.

სამართალდამცველებმა გორში კიდევ ერთი პირი დააკავეს. შსს-ს ინფორმაციით, მან ორსულ ცოლს სიტყვიერი და ფიზიკური შეურაცხყოფა მიაყენა. დანაშაული 1-დან 3 წლამდე ვადით თავისუფლების აღკვეთას ითვალისწინებს. გამოძიება ოჯახის ერთი წევრის მიერ წინასწარი შეცნობით ორსული ქალის მიმართ ჩადენილი ძალადობის ფაქტზე მიმდინარეობს.