აჭარის ავტონომიური რესპუბლიკის უმაღლესმა საბჭომ საზოგადოებრივი მაუწყებლის სამეურვეო საბჭოს წევრის ვაკანტურ თანამდებობაზე აჭარის მთავრობის ყოფილი მრჩეველი, ბესიკ ლილუაშვილი დაასახელა. უმაღლეს საბჭოში ეს გადაწყვეტილება რამდენიმე წუთის წინ მიიღეს.

ლილუაშვილმა აჭარის მთავრობაში მუშაობა 2 მარტს დაასრულა.

საზოგადოებრივი მაუწყებლის სამეურვეო საბჭოს კანდიდატად სახალხო დამცველმა სიდას აღმასრულებელი დირექტორი, ზვიად დევდარიანი დაასახელა.

ამ ეტაპზე უცნობია ვის დაასახელებს საპარალამენტო უმრავლესობა და უმრავლესობას მიღმა დარჩენილი დეპუტატები.

კანდიდატის წარდგენის წესი

რამდენიმე თვეში სამეურვეო საბჭოში უფლებამოსილება ეწურებათ: აჭარის უმაღლესი საბჭოს მიერ დასახელებულ, გიორგი კოხრეიძესა და საპარლამენტო უმრავლესობის მიერ დასახელებულ გრიგოლ გოგელიასა და სახალხო დამცველის მიერ წარდგენილ მარინა მუსხელიშვილს. საბჭო საკუთარი სურვილით რამდენიმე თვის წინ დატოვა უმცირესობის მიერ დასახელებულმა სულხან სალაძემ. სწორედ მათ შესაცვლელადაა კონკურსი გამოცხადებული და კანდიდატებსაც იგივე სუბიექტები წარუდგენენ პარლამენტს.

სალაძის შემცვლელი საბჭოში ორწლიანი ვადით აირჩევა, დანარჩენი სამი კი ექვსწლიანით.