საქართველოს პრეზიდენტი ვაშინგტონში, კონგრესში გამართულ კონფერენციაზე საქართველოს მხარდამჭერი აქტის მიღების ინიციატივით გამოვიდა.

გიორგი მარგველაშვილის განცხადებით, საქართველოს აშშ-სთან სტრატეგიული პარტნიორობა აკავშირებს და მხარდამჭერი აქტი მომდევნო ლოგიკური ნაბიჯი იქნებოდა ურთიერთობების განმტკიცებისათვის:

"საქართველოს მხარდამჭერი აქტი გააერთიანებს ყველა არსებულ თანამშრომლობის ფორმატს და ასევე წარმოქმნის ახალ ფორმატებს. ის უზრუნველყოს, როგორც ჩემი ერის გრძელვადიან სტაბილურობას, ასევე აშშ-ს ინტერესების დაცვას რეგიონში".

გიორი მარგველაშვილმა სიტყვით გამოსვლისას საქართველოს ოკუპირებულ ტერიტორიებზე და ცხინვალში დაღუპულ არჩილ ტატუნაშვილზე ისაუბრა:

"30 წლის წინ, როდესაც ცივი ომი დასრულდა, ვერავინ წარმოიდგენდა, რომ თავისუფალისამყარო კვლავ ცივი ომის გამოწვევების წინაშე დადგებოდა, მაგრამ დღეს, საქართველოს 20% ოკუპირებულია, მოლდოვის ტერიტორიული მთლიანობა კვლავ დარღვეულია, ყირიმი ანექსირებულია, უკრაინაში ომია. დღეს, ჩვენ ყველანი ვლაპარაკობთ მკვლელობის მცდელობაზე სოლსბერიში, საქართველოში, რამდენიმე კვირის წინ, ყოფილი ქართველი სამშვიდობო, რომელიც ერაყში მოკავშირეებთან ერთად მსახურობდა, ოკუპირებულ ტერიტორიაზე მოკლეს. დღეს, მოსკოვიდან კიდევ უფრო შემაშფოთებელ საომარ რიტორიკას ვისმენთ.

აშშ-ს კონგრესში გამართული კონფერენცია "აშშ-საქართველოს პარტნიორობის" საკითხებს მიეძღვნა. კონფერენცია ატლანტიკური საბჭოს და NDI -ის ორგანიზებით გაიმართა და მას ატლანტიკური საბჭოს აღმასრულებელი ვიცე-პრეზიდენტი დეიმონ ვილსონი უძღვებოდა.