დიდი ბრიტანეთის პრემიერ-მინისტრის, ტერეზა მეის განცხადებით, ყოფილი რუსი ჯაშუში სერგეი სკრიპალი და მისი შვილი მოწამლეს ნივთიერებით, რომელიც რუსეთში დაამზადეს.

პრემიერის თქმით, სკრიპალის მოკვლისთვის ნერვულ-პარალეპტიკური ნივთიერება გამოიყენეს, რომელიც ცნობილია სახელწოდებით ნოვიჩოკ (ახალბედა).

მომხდართან დაკავშირებით განმარტებების გასაკეთებლად, რუსეთს ვადა სამშაბათამდე მისცა. მეის თქმით, თუ რუსეთის მხრიდან შესაბამისი განცხადება არ გაკეთდება, სკრიპალის მოწამვლა დიდი ბრიტანეთის ტერიტორიაზე რუსული სახელმწიფო ძალის უკანანო გამოყენებად მიიჩნევა.

სკსრიპალისა და მისი შვილის მოწამვლა

რუსეთის სახელმწიფო უსაფრთხოების სამსახურის ყოფილი აგენტი სერგეი სკრიპალი და მისი შვილი, იულია 4 მარტს ქალაქ სოლსბერიში ნერვულ-პარალეპტიკური ნივთიერებით მოწამლეს. ბრიტანეთის ხელისუფლება ჯერჯერობით არ ასახელებს თუ კონკრეტულად რა ნივთიერებაზეა საუბარი. ამ ნივთიერების ნარჩენებს მიაკვლიეს რესტორან Zizi-ში და ერთ-ერთ პაბში, სადაც შემთხვევამდე რამდენიმე საათით ადრე სკრიპალი და მისი შვილი იმყოფებოდა.

ამ დრომდე ქალაქ სოლსბერიში საგამოძიებო მოქმედებების გამო დაკეტილია ორივე საკვები ობიექტი, სადაც სკრიპალმა და მისმა შვილმა შემთხვევამდე ისადილეს. სოლსბერის პოლიციის მეთაურის განცხადებით, ამ ორ ობიექტში სკრიპალის მოწამვლის შემდეგ დაახლოებით 500 ადამიანი იყო. ასევე, საგამოძიებო მოქმედებები მიმდინარეობს სკრიპალის სახლში და მისი გარდაცვლილი ცოლისა და შვილის საფლავზე.

მიმდინარე გამოძიებაში, კონტრტერორისტული დეპარტამენტის 250 თანამშრომელი მონაწილეობს. ამ დროისთვის შეგროვებულია დაახლოებით 200 ნივთმტკიცება. ასევე, განსაზღვრულია მოწმეების სავარაუდო წრე, რომლებიც შეძლებენ რაიმე სახის დახმარება გაუწიონ გამოძიებას, ამ წუთისთვის ასეთი სულ 240 ადამიანია.

სკრიპალი და მისი შვილი ამ დრომდე კრიტიკულად მძიმე მდგომარეობაში საავადმყოფოში რჩებიან. შედარებით მსუბუქია იმ პოლიციელის ჯანმრთელობის მდგომარეობა, რომელიც პირველად მიუახლოვდა სკრიპალს, თუმცა პოლიციელი უკვე გონზე მოვიდა.