"გრეის ანატომიის" ფანებს, მე-14 სეზონის შემდეგ, კიდევ ორ მთავარ პერსონაჟთან მოუწევთ გამომშვიდობება.

ჯესიკა კეპშოუმ (არიზონა რობინსი) და სარა დრიუმ (ეიპრილ კეპნერი) ABC-ის სამედიცინო დრამის მიტოვება გადაწყვიტეს.

"გვსურს დიდი მადლობა გადავუხადოთ ჯესიკას და სარას გაწეული სამსახურისთვის. მათმა ფენომენალურმა ნიჭმა შეძლო და არიზონასა და ეიპრილის პერსონაჟები რეიტინგის მწვერვალამდე აიყვანა", - ამბობს სერიალის აღმასრულებელი პროდიუსერი კრისტა ვერნოფი.

ამ თემას გამოეხმაურა "გრეის ანატომიის" შემქმნელი, შონდა რაიმსიც.

"ყოველთვის რთულია დავემშვიდობო ჩემს შექმნილ პერსონაჟს. არიზონა და ეიპრილი არ იყვნენ მხოლოდ პერსონაჟები, ისინი ლგბტქ თემისა და ქრისტიანებისთვის სამაგალითო გმირებად ჩამოყალიბდნენ. გულწრფელად მადლობელი ვარ ჯესიკასი და სარასი, მათი გაწეული სამსახურისთვის და შთამბეჭდავი შესრულებისთვის, იმისთვის, რომ ქალებისთვის, მსოფლიოს გარშემო, შთაგონების წყარო გახდნენ. ისინი სამუდამოდ დარჩებიან შონდალენდის ოჯახის წევრებად", - ამბობს შონდა რაიმსი.

მსახიობების წასვლის მიზეზები ამ ეტაპზე არ ხმაურდება.