რუსეთის პრეზიდენტმა, ვლადიმერ პუტინმა განაცხადა, რომ ბირთვული შეტევა გლობალურ კატასტროფას გამოიწვევს.

ბირთვული იარაღის გამოყენებაზე პუტინმა ჟურნალისტის, ვლადიმერ სოლოვიევის ფილმ "მსოფლიო წყობა 2018-ში" ისაუბრა. ფილმი პუტინის საქმიანობისა და სამომავლო ხედვების პიარკამპანიას ემსახურება.

მისი თქმით, რუსეთს ბირთვული იარაღის გამოყენება მხოლოდ იმ შემთხვევაში შეუძლია, თუ რაკეთა მათკენ იქნება მიმართული.

"ამას კონტრშეტევა ჰქვია. თუ ეს რუსეთის განადგურების გადაწყვეტილებაა, ჩვენ კანონიერი უფლება გვაქვს ვუპასუხოთ. დიახ, კაცობრიობისთვის ეს გლობალური კატასტროფა იქნება. მაგრამ, როგორც რუსეთის მოქალაქემ და რუსული სახელმწიფოს მეთაურმა, მინდა დავსვა კითხვა: რად გვინდა ისეთი მსოფლიო, თუ იქ რუსეთი არ იქნება?", - თქვა პუტინმა.

მან აღნიშნა, რომ იარაღის გამოყენების გეგმა მხოლოდ თეორიული ხასიათისაა და იმედი აქვს, რომ ბირთვული შეტაკება არასდროს მოხდება.

პირველ მარტს ფედერალურ საბჭოსთან გამართულ ყოველწლიურ შეხვედრაზე, რუსეთის პრეზიდენტმა ვლადიმერ პუტინმა, ახალი ბალისტიკური რაკეტები და მრავალფუნქციური ბირთვული იარაღი წარადგინა.

"ჩვენ არავინ გვისმენდა, მოგვისმინეთ ეხლა. იმედი მაქვს, რაც აქ ითქვა და აჩვენეს, გამოაფხიზლებს პოტენციურ აგრესორს", - პუტინს არ დაუკონკრეტებია თუ ვის გულისხმობდა "პოტენციურ აგრესორში", თუმცა საკუთარი გამოსვლის თითქმის ნახევარი მან აშშ-ზე საუბარს დაუთმო.