საქართველოს პარლამენტმა დღეს, 7 მარტის პლენარულ სესიაზე შრომის უსაფრთხოების შესახებ კანონი მესამე მოსმენით მიიღო, 88 ხმით არცერთის წინააღმდეგ.

შრომის უსაფრთხოების შესახებ კანონი ვრცელდება მომეტებული საფრთხის შემცველ, მძიმე, მავნე და საშიშპირობებიან სამუშაოებზე. მომეტებული საფრთხის შემცველ, მძიმე, მავნე და საშიშპირობებიანი სამუშაოების ჩამონათვალს განსაზღვრავს საქართველოს მთავრობა სოციალურ პარტნიორებთან შეთანხმებით.

სფეროების ჩამონათვალი, რომელზეც შრომის უსაფრთხოების შესახებ კანონი გავრცელდება

ბოლო რამდენიმე წელია საქართველოში ეფექტიანი შრომის ინსპექციის არარსებობასა და დასაქმებულთა უფლებების დარღვევაზე მიუთითებენ არასამთავრობო ორგანიზაციები და პროფესიული კავშირები.

შრომის უსაფრთხოების შესახებ კანონპროექტი 2017 წლის ივნისში შეიტანა პარლამენტში ჯანდაცვის სამინისტრომ. აღნიშნული ცვლილებით, შრომის ინსპექტირების უფლებამოსილება უნდა გაიზარდოს და შესაბამისად ქმედითი უნდა გახდეს.

საქართველოს მთავრობამ, ამ კანონის ამოქმედებიდან 3 თვის ვადაში უნდა განსაზღვროს კანონის გავრცელების არეალი. ხოლო, კანონდამრღვევს პასუხისმგებლობა დაეკისრება მთავრობის აქტის გამოცემიდან 90 დღის შემდეგ.

გაერთიანებული პროფკავშირების სტატისტიკით, 2017 წელს, 41 ადამიანი დაიღუპა და 66 მძიმედ დაშავდა სამუშაოს შესრულების დროს. მათგან, მშენებლობაზე მუშაობისას 17 გარდაიცვალა და 22 მძიმედ დაშავდა. მათივე ცნობით, გაცილებით დიდია სიკვდილიანობის შედეგები ტრამვის შემდეგ, რასაც ოფიციალური უწყებები აღარ აღრიცხავენ.

Human Rights Watch-ის 2018 წლის ანგარიშის თანახმად, საქართველოში ყოველ წელს ათეულობით მუშა იღუპება და ასობით შავდება საწარმოო ინციდენტების შედეგად.

ორგანიზაცია ეყრდნობა სახალხო დამცველის ინფორმაციას და წერს, რომ შრომის უსაფრთხოების ნორმების დაუცველობის გამო ბოლო 5 წელიწადში 270 ადამიანი გარდაიცვალა.

სად გადის ზღვარი ბიზნესის ინტერესსა და შრომით უფლებებს შორის