იტალიის საპარლამენტო არჩევნების წინასწარი შედეგებით, როგორც ცალკეული პარტია, ევროსკეპტიკოსების ჯგუფი ხუთი ვარსკვლავის მოძრაობა ლიდერობს.

მიუხედავად ამისა, ექს-პრემიერის, სილვიო ბერლუსკონის მემარჯვენე-ცენტრისტული კოალიცია, რომლის შემადგენლობაში შედის ულტრა-მემარჯვენეთა ლიგა, სავარაუდოდ, პარლამენტის ქვედა პალატაში ყველაზე მეტ ადგილს დაიკავებს.

გამოკვეთილი გამარჯვებული ჯერჯერობით არ არის, რადგან მმართველობის მოსაპოვებლად ხმების 40%-ია საჭირო. წინასწარი შედეგებით, ჩანს, რომ გამარჯვებულია მემარჯვენე ცენტრისტული კოალიცია, რომელმაც საბოლოო ჯამში ხმების 36,1% დააგროვა.

კოალიცია შედგება ბერლუსკონის ფორცა იტალიასაგან, მატეო სალვინის ულტრა-მემარჯვენე ლიგისაგან და ნეო-ფაშისტური იტალიის ძმებისგან.

La Reppublica-ზე გამოქვეყნებული წინასწარი შედეგები ასე გამოიყურება:

  • ხუთი ვარსკვლავის მოძრაობა - 32%;
  • ლიგა - 17,9%;
  • სილვიო ბერლუსკონის ფორცა იტალია: - 13,9%;
  • მატეო რენცის დემოკრატიული პარტია - 19%.

როგორც გამოცემა La Repubblica წერს, რენცის პარტიამ დღევანდელი შედეგით ფსიქოლოგიური დარტყმა განიცადა, რადგან ხმების მეხუთედიც კი ვერ მიიღო.

იტალიური ყოველდღიული გამოცემა Il Fatto Quotidiano დღეს, 5 მარტის გარეკანზე აქვეყნებს სტატიას სათაურით "ყველაფერი შეიცვლება".

BBC-ის ცნობით, შედეგები აჩვენებს, რომ არ იქნება ერთპარტიული მმართველობა, თუმცა, პოპულისტების მიმართ ამგვარ მხარდაჭერას ბრექსიტსა და აშშ-ში დონალდ ტრამპის არჩევას ადარებენ.

ამავე თემაზე: არჩევნები იტალიაში: რა უნდა ვიცოდეთ და რატომ არის მნიშვნელოვანი - მოკლედ