საქართველოს მართლმადიდებელი ეკლესიის პატრიარქის, ილია II-ის თხოვნას არჩილ ტატუნაშვილის ცხედრის გადმოსვენებაში დახმარებაზე, რუსეთის პატრიარქი კირილე პასუხობს: ყოველმხრივ ვეცდები ეს მაქსიმალურად მოკლე დროში განხორციელდეს. ინფორმაციას საქართველოს საპატრიარქო ავრცელებს.

საპატრიარქოს განცხადებაში ნათქვამია, რომ მათი ინფორმაციით, არჩილ ტატუნაშვილის ცხედარი ექსპერტიზაზეა და მას საქართველოში საერთაშორისო ორგანიზაცია წითელი ჯვარი ჩამოასვენებს.

ტატუნაშვილის საქმე

22 თებერვალს ცხინვალის ციხეში საქართველოს მოქალაქე გარდაიცვალა. ოსური მხარის ვერსიით, არჩილ ტატუნაშვილმა იზოლატორში გადაყვანისას პოლიციელისთვის იარაღის წართმევა სცადა, საპასუხო ძალის გამოყენების შედეგად შეუძლოდ გახდა, კიბეებზე წაიქცა და მოგვიანებით საავადმყოფოში დაიღუპა.

სახელმწიფო უსაფრთხოების სამსახურის ინფორმაციით, ოსური მხარე აცხადებს, რომ ტატუნაშვილი ინფარქტით დაიღუპა და მისი ცხედრის ექსპერტიზაზე უარს ამბობს. გარდაცვლილის ცხედარი ოკუპირებულ ცხინვალს 24 თებერვალს უნდა გადმოესვენა, თუმცა დე ფაქტო ხელისუფლებამ პოზიცია შეცვალა.

ახალგორში არჩილ ტატუნაშვილთან ერთად დაკავებული იყო საქართველოს კიდევ ორი მოქალაქე. სუს-ის ცნობით, ლევან ქუტაშვილი და იოსებ პავლიაშვილი უკვე ცხინვალის ციხიდან ახალგორში გადაიყვანეს. ოსური მხარე მათ გადმოცემაზე უარს ამბობს.

დღეს, 4 მარტს, საქართველოს 13 ქალაქში ოკუპაციის წინააღდეგ მიმართული და გარდაცვლილი არჩილ ტატუნაშვილის მიმართ სოლიდარობის აქცია - მშვიდობა ომზე მეტია გაიმართება.