ტელეკომპანია იმედის ჟურნალისტი, დავით ცაგარელი ტელეეკრანებზე და პირდაპირ ჩართვებში ერთი კვირის განმავლობაში სათვალით გამოდიოდა.

28 წლის ჟურნალისტის "ექსპერიმენტი" მას შემდეგ დაიწყო, რაც მან გაიგო, რომ მის 9 წლის შვილს, ნიკოლოზს, კლასელები სათვალის ტარების გამო დასცინოდნენ.

დავითი შვილს ეუბნებოდა, რომ თანატოლებისთვის ყურადღება არ მიექცია, თუმცა ამან "არ იმუშავა", ამის შემდეგ გადაწყვიტა ჟურნალისტმა ეთერში სათვალით გამოსულიყო და ისე დაემტკიცებინა შვილისთვის, რომ სათვალის ტარება პრობლემას არ წარმოადგენს.

"ყველაფერი მას შემდეგ დავგეგმე, რაც ჩემმა შვილმა მითხრა: "ვერ წარმოიდგენ, როგორი რთული სათვალის ტარება'" - უთხრა დავითმა რუსულენოვან SOVA-ს.

ექსპერიმენტის მიხედვით, დავითს 50 ზრდასრული ადამიანის აზრი უნდა მოესმინა, თუმცა ის რაც მოისმინა, მაინცდამაინც არ მოეწონა.

ჟურნალისტის თქმით, 50-დან 49 ადამიანი მის ცვლილებას არც ისე დადებითად შეხვდა: "ეს შენი ახალი იმიჯია?" "ოთხთვალიანი გახდი?" "არ გიხდება".

ამის შესახებ დავითმა ფეისბუქზეც დაწერა. მისი სიტყვებით, მხოლოდ 1 ადამიანის რეაქცია იყო "გიხდება".

"9 წლის ასაკში ამის მოსმენა გაცილებით რთულია" - ამბობს ჟურნალისტი.