ადვოკატთა ასოციაციის თავმჯდომარე, დავით ასათიანი, ანა ნაცვლიშვილის მკვლელობაში ბრალდებულის ადვოკატის განცხადებას ეხმაურება, რომელმაც გუშინ მსხვერპლის პირადი ცხოვრების დეტალები გაასაჯაროვა.

ფეისბუქის საკუთარ გვერდზე გავრცელებულ განცხადებაში, დავით ასათიანი წერს, რომ ადვოკატთა ასოციაცია მოახდენს ადეკვატურ რეაგირებას, რათა გამოირიცხოს მსგავსი ფაქტები. მისივე თქმით, ასეთი საქციელი მიუღებელია და არ შეესაბამება ადვოკატის როლსა და საქმიანობის პრინციპებს:

"ადვოკატს, კლიენტის ინტერესების დაცვის გარდა, გააჩნია განსაკუთრებული საზოგადოებრივი პასუხისმგებლობა ხარისხიან მართლმსაჯულებაზე, რაც ასევე გულისხმობს ადამიანის პირადი ცხოვრების ფუნდამენტური უფლების მკაცრად დაცვასაც, მით უფრო მაშინ, როდესაც გარდაცვლილის შელახული პირადი უფლების აღდგენა ვერ განხორციელდება. მინდა საზოგადოების გასაგონად განვაცხადო, რომ ქართველ ადვოკატთა უმრავლესობა თავდადებით შრომობს მოქალაქეთა დასაცავად და სწორად ესმის საკუთარი როლი, თუმცა, სამწუხაროდ, არის გამონაკლისი შემთხვევები და შეცდომები, ხანდახან მძიმეც, რაც გულწრფელად მაშფოთებს".

დავით ასათიანის თქმით, ქალთა მიმართ ძალადობა და ფემიციდის გახშირებული შემთხვევები უკვე ურთულეს პრობლემად იქცა. მისივე განცხადებით, ამ ყველაფერზე სასწრაფო რეაგირებაა საჭირო როგორც ხელისუფლების, ისე საზოგადოების მხრიდან.

თემქაზე ახალგაზრდა გოგოს მკვლელობაში ბრალდებულის ადვოკატმა, ნაირა ოტიაშვილმა გუშინ 23 თებერვალს, მოკლული ანა ნაცვლიშვილის შესახებ პირადი ცხოვრების დეტალებზე სასამართლო ისაუბრა.

ბრალდებულს სასამართლომ აღკვეთის ღონისძიების სახით პატირობა შეუფარდა.

შინაგან საქმეთა სამინისტროს ინფორმაციით, თემქაზე 20 წლის გოგოს მკვლელობის ბრალდებით, მისივე მეგობარია დაკავებული. უწყების განცხადებით, ბრალდებულმა მკვლელობა შურისძიების მოტივით ჩაიდინა.

დაუზუსტებელი ინფორმაციით, გარდაცვლილი ყოფილმა შეყვარებულმა მოკლა, უწყებაში ამ საკითხზე კომენტარს არ აკეთებენ.