ქართული ოცნების წევრი, დეპუტატი ზაზა პაპუაშვილი დღეს, 23 თებერვლის პარლამენტის სხდომაზე თბილისში გატაცებული აზერბაიჯანელი ჟურნალისტის, აფგან მუხთარლის საქმის საგამოძიებო კომისიის შექმნას გამოეხმაურა. პაპუაშვილმა ევროპული საქართველოს წევრს ელენე ხოშტარიას უპასუხა:

"ძალიან საყვარლად კი მოჰყევით ამ ჟურნალისტთან დაკავშირებით, თურმე პურის საყიდლად მიდიოდა, კაცმა რა დააშავა?! ასე პურის საყიდლად მიდიოდნენ და დროის სატარებლად თავის შეყვარებულებთან, ის ახალგაზრდა ბიჭები, იქ რომ ჩახოცეთ ქუჩებში და სადაც ხელი მიგიწვდათ. მაგრამ თქვენ არავითარი კომისიის შექმნა არ მოგინდომებიათ მაშინ. ახლა ეს მუხთარლი, რომელიც ათას საშინელ განცხადებებს აკეთებს ჩემი ქვეყნის და ჩემი სახელმწიფოს წინააღმდეგ და მისი მეუღლე, რატომ უნდა ვენდო მე მის სიტყვებს და არ ვენდო ჩემს გამოძიებას, ჩემს კოლეგებს და რატომ უნდა გენდოთ თქვენ".

პარლამენტის დღევანდელ სესიაზე ევროპული საქართველოს ინიციატივას განიხილავენ, შეიქმნას საგამოძიებო კომისია, რომელიც აფგან მუხთარლის საქმეზე იმუშავებს. ელენე ხოშტარიამ ტრიბუნასთან კომისიის შექმნის აუცილებლობაზე ისაუბრა.

13 თებერვალს მუხთარლის საქმეს სახალხო დამცველი, ნინო ლომჯარია გამოეხმაურა და თქვა, რომ ჟურნალისტის გაუჩინარების გარემოებების გამოძიება არაეფექტურად მიმდინარეობს.

აფგან მუხთარლი თავის გატაცებაზე პასუხისმგებლობას საქართველოს პრემიერ-მინისტრ გიორგი კვირიკაშვილს აკისრებს და მიაჩნია, რომ აზერბაიჯანის პრეზიდენტის, ილჰამ ალიევის და საქართველოს ყოფილი პრემიერის, ბიძინა ივანიშვილის ბიზნესპარტნიორობის მსხვერპლი გახდა. ინტერვიუ მუხთარლისთან რუსთავი 2-მა ჩაწერა და თარგმანიც მას ეკუთვნის.

მუხთარლი თბილისიდან 29 მაისს გაუჩინარდა და მეორე დღეს ბაქოს ციხეში აღმოჩნდა. მას ექვსწლიანი პატიმრობა მიუსაჯეს. ამ დრომდე საქართველოს საგამოძიებო უწყებებს მუხთარლის შესაძლო გატაცებაზე გამოძიების დეტალების შედეგები არ გაუვრცელებიათ.