კორუფციის აღქმის 2017 წლის ინდექსის თანახმად, საქართველომ წინა წელთან შედარებით მდგომარეობა გააუარესა. კვლევის მიხედვით, 180 ქვეყანას შორის საქართველო 56 ქულით 46-ე ადგილზეა. საქართველოს მაჩვენებელი საუკეთესოა აღმოსავლეთ ევროპის (ევროკავშირის წევრი ქვეყნების გამოკლებით) და ცენტრალური აზიის რეგიონში.

"ბოლო წლების მანძილზე კორუფციის აღქმის ინდექსში საქართველოს პოზიციის უცვლელობა (2017 წელს კი გაუარესება) მიანიშნებს, რომ საქართველოს მიერ მიღწეული გარკვეული პროგრესის შემდეგ, ხელისუფლებამ ანტიკორუფციული ძალისხმევა ახალ ეტაპზე უნდა აიყვანოს", - ნათქვამია ორგანიზაციის განცხადებაში.

ფოტო: საერთაშორისო გამჭვირვალობა

2017 წლის ინდექსის თანახმად, კორუფციის აღქმის დონე ყველაზე დაბალია ახალ ზელანდიასა და დანიაში (89 და 88 ქულა ქულა), ხოლო ყველაზე მაღალი - სომალიში (9 ქულა), სამხრეთ სუდანსა (12 ქულა) და სირიაში (14 ქულა).

ბოლო სამი წლის განმავლობაში კორიფციის აღქმის ინდექსი არ შეცვლილა რუსეთში და წელსაც მას 29 ქულა მიანიჭეს. ინდექსის მიხედვით, აზერბაიჯანი 31 ქულით 122-ე ადგილს იკავებს, ხოლო სომხეთი 35 ქულით 107-ე ადგილზეა.

კორუფციის აღქმის ინდექსი, რომელიც წელს 25-ედ ქვეყნდება, ემყარება ექსპერტების მოსაზრებებს საჯარო სექტორში კორუფციის დონის შესახებ. რეიტინგში 100 ქულა კორუფციის აღქმის ყველაზე დაბალ, ხოლო 0 ქულა - ყველაზე მაღალ დონეს აღნიშნავს.