საქართველოს პრეზიდენტის საპარლამენტო მდივნის ანა ნაცვლიშვილის განცხადებით, პარლამენტმა მხოლოდ ფორმალურად დაძლია ვეტო და დარბაზშივე აღიარა, პრეზიდენტის ვეტოს არგუმენტების სისწორე.

მაუწყებლობის შესახებ კანონპროექტზე ვეტოს დაძლევის შემდეგ ანა ნაცვლიშვილმა განაცხადა, რომ დღეს არაფერი ახალი არ იხილა საზოგადოებამ პარლამენტში, რაც არაერთ ვეტოზე არ მომხდარა:

"ჯერ დაძლევენ პრეზიდენტის ვეტოს თითქოს იმ მოტივით, რომ არგუმენტები არ არის ზუსტი და ასე შემდეგ, ცოტა ხანში, თვითონვე ცდილობენ ზუსტად ის ცვლილებები შეიტანონ, რაც ვეტოშია დაფიქსირებული. უბრალოდ, მათთვის რთულია პრეზიდენტის ვეტოს გაზიარება და ამიტომ, ასე არა რაციონალურად იხარჯება სახელმწიფო რესურსი, დრო და ენერგია. დღესვე აღიარეს მათ, რომ ის ნაწილი, რაც ეხებოდა შესყიდვებს არასწორია და რაც წერია ვეტოში სწორი. და ცოტა ხანში ვნახავთ იმ აღიარებასაც, რომ დიახ, მედიაგარემოზე ამ ყველაფერმა ძალიან ცუდი გავლენა მოახდინა".

მაუწყებლობის შესახებ კანონში შესატანი ცვლილებების კანონპროექტზე საქართველოს პარლამენტმა ვეტო დღეს, 21 თებერვლის პლენარულ სხდომაზე დაძლია.

ცვლილებების მიხედვით, საზოგადოებრივ მაუწყებელს კომერციული რეკლამის დამატებით განთავსების უფლება ექნებოდა და რიგ შემთხვევაში ტენდერის გარეშე მომსახურების შეძენა შეეძლებოდა. ცვლილებების ასამოქმედებლად პარლამენტის მიერ ვეტოს დაძლევა იყო საჭირო.

პრეზიდენტს მიაჩნია, რომ სარეკლამო ბაზარი ისედაც მილევადია, ყოველწლიურად მცირდება და საზოგადოებრივი მაუწყებლის სიკეთე არ უნდა დაუპირისპირდეს მედიამრავალფეროვნებას. მისი თქმით, გარანტირებული დაფინანსების მქონე მაუწყებლის სარეკლამო ბაზარზე შესვლით მედიაბაზარი დაზარალდება.