გერმანიიდან საქართველოს 65 მოქალაქე გამოაძევეს. როგორც On.ge-ს შსს-ში განუცხადეს, გერმანია დაატოვებინეს იმ მოქალაქეებს, რომლებმაც ევროკავშირის ტერიტორიაზე უვიზოდ ყოფნის პირობები დაარღვიეს. უწყების განმარტებით, მათ დეპორტაცია შეეხოთ.

"გერმანიის ფედერაციულ რესპუბლიკიდან გუშინ განხორციელდა მორიგი რეადმისია, უკან გამოაბრუნეს საქართველოს 65 მოქალაქე, რომლებმაც დაარღვია ევროკავშირის სივრცეში ყოფნის სავიზო რეჟიმი", - განაცხადეს საქართველოს შინაგან საქმეთა სამინისტროში.

მიმდინარე თვეში, თავშესაფრის მინიჭების ევროპული სააგენტოს (EASO) სტატისტიკის მიხედვით, 2016 წელთან შედარებით, 2017 წელს ევროკავშირის წევრ ქვეყნებში თავშესაფრის მაძიებელი საქართველოს მოქალაქეების რიცხვი 35 პროცენტით გაიზარდა.

2016 წლის დეკემბერში, ევროკავშირში თავშესაფრის მაძიებელი საქართველოს მოქალაქეების რაოდენობა 625 იყო, 2017 წლის იმავე პერიოდში 1570 აპლიკანტამდე გაიზარდა.

ასევე, გერმანიის საზოგადოებრივი მაუწყებლის ინფორმაციით, გაზრდილი კრიმინალის მიზეზით, გერმანიის ჩრდილოეთ რაინ-ვესტფალიის მთავრობას სურს, რომ საქართველოს მოქალაქეებს უვიზო რეჟიმი შეეზღუდოთ.

საქართველოს საგარეო საქმეთა სამინისტრომ მოუწოდა ყველა მოქალაქეს, რომ ევროკავშირთან ვიზალიბერალიზაციის მხოლოდ დაშვებული პირობებით ისარგებლონ, რაც გულისხმობს მხოლოდ ტურისტული და მოკლე ვადიანი, 90 დღიანი ვიზიტით, შენგენის ქვეყნებში გამგზავრებას.

საქართველოს მოქალაქეებისთვის შენგენის ზონის ქვეყნებში უვიზო მიმოსვლა 2017 წლის 28 მარტს ამოქმედდა.