2018 წლის 17 თებერვალს ფაბრიკაში ღონისძიება ჩატარდა, რომელსაც "2017 წლის საუკეთესო ქოუბერების დაჯილდოება" ერქვა. ღონისძიების სახელწოდებამ და შემდეგ, მედიაში სიტყვა "ქოუბის" გამოჩენამ, ინტერნეტ მომხმარებლებს კითხვები გაუჩინა: რომელია სწორი - ქუბი თუ ქოუბი? საკითხი იმდენად აქტუალური გახდა, რომ გადავწყვიტეთ ამ კითხვაზე პასუხი გაგვეცა.

აქამდე, მომხმარებლების უმრავლესობისთვის "ქუბი" იყო ერთადერთი სწორი სიტყვა, რომელიც ათ წამიანი ვიდეოების აღსანიშნად გამოიყენებოდა. ერთი შეხედვით, ეს ასეც არის, რადგან Coub ინგლისური ტრანსკრიპტით "ქუბ"-ად იკითხება. ამას გვეუბნება თავად Coub-ის კითხვების განყოფილებაც, სადაც გარკვევით წერია, რომ Coub ინგლისურ ტრანსკრიპტში იკითხება როგორც ქუბი [ku:b] და ამის მაგალითად მოყვანილია სიტყვა boobs.

ყველაფერი იმაზე მიუთითებს, რომ საქართველოში ამ სიტყვაზე სწორი წარმოდგენა აქვთ, თუმცა ჩვენ მაინც გადავწყვიტეთ ინფორმაციის გადამოწმება და Coub-ს ოფიციალურად დავუკავშირდით. ჩვენ პირადად გავესაუბრეთ Coub-ის მარკეტინგის დირექტორს და დავუსვით შემდეგი კითხვა:

როგორ უნდა წარმოვთქვათ სწორად: ქუბი თუ ქოუბი?

რაზეც მან გვიპასუხა, რომ სწორი სახელწოდებაა ქოუბი [kou:b].

ჩვენ ცხადია დავინტერესდით, რატომ იყო სწორი "ქოუბი" და არა "ქუბი", მითუმეტეს, რომ საიტზე საპირისპირო წერია?

ამაზე მან გვიპასუხა, რომ ინგლისურად სიტყვა იკითხება როგორც "ქუბი", თუმცა Coub.com რუსებმა შექმნეს და მათ იდეაში ქოუბი ჩაიფიქრეს, ამიტომ ერთადერთი სწორი სახელწოდება არის ქოუბი.

"ჩვენ ყოველთვის ვამბობთ ქოუბს და არასდროს ქუბს" - ამბობს Coub-ის წარმოამდგენელი.

ამ პასუხმა კიდევ ერთი დამატებითი კითხვა გააჩინა. როგორ უნდა დაუძახონ უცხოელმა მომხმარებლებმა, რომლებიც არც ამერიკელები არიან და არც რუსები - ქოუბი თუ ქუბი?

კითხვაზე მან ასე გვიპასუხა: "ჩვენმა კომპანიამ შექმნა ქოუბი და ერთადერთი სწორი სახელწოდება სწორედ ესაა".