თბილისის საქალაქო სასამართლომ შპს ლანცეტი-ს დირექტორს, ფარმან ჯეირანლის პაციენტებისგან დიდი ოდენობით ფულადი თანხების მოტყუებით დაუფლების ბრალდებით 6 წლით თავისუფლების აღკვეთა მიუსაჯა.

პროკურატურის განცხადებით, სასამართლოში დადასტურდა, რომ შპს ლანცეტის დირექტორმა რომელსაც სანებართვო მოწმობის შესაბამისად მოპოვებული ჰქონდა ორგანოთა გადანერგვისა და ტრანსპლანტაციის ნებართვა, 2016 წლის დასაწყისში აზერბაიჯანის რესპუბლიკიდან მოიწვია ქირურგ-ტრანსპლანტოლოგი, რომელსაც საქართველოში საექიმო საქმიანობისთვის არ ჰქონდა სახელმწიფო სერთიფიკატი არცერთ შესაბამის სპეციალობაში.

2016 წელს კლინიკა ლანცეტში ორი ოპერაცია ჩატარდა, რომლის შედეგად გიორგი ჩუბინიძე და კარლო კეკელიძე გარდაიცვალნენ.

პროკურატურის ინფორმაციით, ბრალდებულმა პაციენტებს განუცხადა, რომ მათ სასწრაფოდ ესაჭიროებოდათ ღვიძლის გადანერგვა და აუცილებელი იყო გადაუდებელი ოპერაცია, რის სანაცვლოდაც პაციენტებისგან მოითხოვა ოპერაციისთვის საჭირო თანხის დაუყოვნებლივ გადახდა.

ფარმან ჯეირანლიმ პაციენტების დონორების და მისი ოჯახის წევრებს არ მიაწოდა ინფორმაცია ოპერაციის რისკების შესახებ ასევე არ აიღო თანხმობა ტრანსპლანტაციის საბჭოში.

საქართველოს პროკურატურამ ფარმან ჯეირანლი 2017 წლის 22 მაისს დააკავა. ბრალდებული დანაშაულს არ აღიარებდა.