პანკისის სპეცოპერაციის შედეგად გარდაცვლილი თემირლან მაჩალიკაშვილის ოჯახი ტელეკომპანია იბერიას ეთერში გაკეთებულ განცხადებაზე განმარტაბას ავრცელებს:

"ჩვენი ემოციური განცხადება პანკისის დაკარგვის თაობაზე, არ შეიცავდა სხვა აზრს გარდა იმისა, რომ ხელისუფლების მიმართ ხეობის ნდობის პრობლემაზე გაგვესვა ხაზი".

2 თებერვალს, თემირლან მაჩალიკაშვილის მამამ, მალხაზ მაჩალიკაშვილმა თქვა, რომ თუ სპეცოპერაციის მონაწილეები არ დაისჯებიან, საქართველო პანკისის ხეობას დაკარგავს.

მაჩალიკაშვილების ოჯახის განცხადებით, ეთერში გაჟერებულ განცხადებას არასწორი განმარტებები მიეცა სხვადახვა ადამიანებისა და ჯგუფების მიერ:

"ნდობის აღდგენის ხაზი დღეს ამ საქმეზე სიმართლის დადგენის პროცესზე გადის და ეს მთელი ხეობისთვის ასეა. ჩვენ კიდევ ერთხელ ვიმეორებთ, რომ თემირლანის საქმეზე მისი ოჯახი ბოლომდე ვიბრძოლებთ სიმართლის დადგენისთვის. სიმართლის დადგენა ჩვენთვის ნიშნავს სპეცოპერაციის ამ ფორმით დამგეგმავი და განმახორციელებული სუს-ის მაღალი თანამდებობის პირების და სროლის განმახორციელებელი პირის სამართლებრივ დასჯას და თემირლანის უდანაშაულობის დამტკიცებისთვის ჩვენთვის სამართლებრივი შესაძლებლობის მოცემას. ჩვენ მოვითხოვთ, სახელმწიფომ დაამტკიცოს, რომ თემირლანმა ნამდვილად იცოდა, რომ ის ბიჭები, რომელსაც თითქმის მთელი ხეობა და ჩვენი ოჯახიც სხვა სახელებით იცნობდა და მეგობრობდა, ტერორისტები იყვნენ და სწორედ ამ მიზნით მათ თემირლანი სხვადასხვა რესურსებით ეხმარებოდა. თუ ამას თავის დროზე დამიმტიკებდა ხელისუფლება, ჩემი ხელით მივუყვანდი ჩემს შვილს დასაპატიმრებლად. ამისთვის ომის ტექნიკის გამოყენება ხელისუფლებას ჩვენს ოჯახთან არ დასჭირდებოდა".

19 წლის თემირლან მაჩალიკაშვილი, რომელიც პანკისის ხეობაში სპეცოპერაციისას სპეცრაზმელმა თავში დაჭრა, 2017 წლის 10 იანვარს ორკვირიანი კომატოზური მდგომარეობის შემდეგ გარდაიცვალა.