პარლამენტის საგარეო ურთიერთობათა კომიტეტის თავჯდომარის, თედო ჯაფარიძის განმარტებით, ქართული ოცნების განცხადება გიგი წერეთლის ეუთოს საპარლამენტოს ასამბლეის პრეზიდენტობის პოსტზე მხარდაჭერასთან დაკავშირებით სწორია, რადგან ნაციონალური მოძრაობა საერთაშორისო ფორუმებზე აშკარად ხელისუფლების საწინააღმდეგო ნაბიჯებს დგამს ხოლმე:

"როგორი განცხადება უნდა გაეკეთებინა სხვანაირი. ეს არის ჩვეულებრივი მოვლენა. მე ახლა ძალიან ხშირად ვმონაწილეობ საერთაშორისო ფორუმებში და იქ თქვენ ყველა კარგად ხედავთ, როგორ ღიად, დაუფარავად მოქმედებენ იგივე ნაციონალური მოძრაობის წარმომადგენლები, რომლებიც გამოდიან აშკარად და ღიად იმ პოზიციების წინააღმდეგ, რომელიც გააჩნია ხელისუფლებას და უმრავლესობას".

ეუთოს საპარლამენტო ასამბლეის 25-ე ყოველწლიური სესია საპარლამენტო ასამბლეის პრეზიდენტის არჩევით დასრულდება. აღნიშნულ პოსტზე ნაციონალური მოძრაობის წევრი, გიგი წერეთელია წარდგენილი, რომელსაც ქართული ოცნება მხარს არ უჭერს და განმარტავს, რომ ვინაიდან 2016 წლის 8 ოქტომბრის საპარლამენტო არჩევნებში ეუთოს საპარლამენტო ასამბლეა ერთ-ერთ მთავარ სადამკვირვებლო მისიას წარმოადგენს, მას ექნება შესაძლებლობა, რაიმე ფორმით გავლენა მოახდინოს არჩევნების შედეგების შეფასებაზე.