საგარეო საქმეთა სამინისტრო გმობს ოკუპირებული ცხინვალის რეგიონის სამხედრო დაჯგუფებების რუსეთის შეიარაღებული ძალების შემადგენლობაში გაერთიანებაზე ე.წ. შეთანხმების რატიფიცირებას.

რუსეთის ფედერაციის სახელმწიფო დუმაში დოკუმენტს რატიფიცირებას, დღეს, 24 იანვარს კენჭი უყარეს - 411- ხმით არცერთის წინააღმდეგ. შეთანხმებით, ოკუპირებული სამხრეთ ოსეთის ე.წ. შეირაღებული ქვედანაყოფები რუსული არმიის შემადგენლობაში უკვე ოფიციალურად ირიცხებიან.

საქართველოს საგარეო უწყების შეფასებით, აღნიშნული აფხაზეთისა და ცხინვალის რეგიონების ფაქტობრივი ანექსიისაკენ მიმართული მორიგი უკანონო ქმედებაა, რუსეთის ფედერაციის მხრიდან:

"ეს სრულად უგულებელყოფს საერთაშორისო სამართლის ფუნდამენტურ ნორმებსა და პრინციპებს".

საგარეო საქმეთა სამინისტრო აცხადებს, რომ საქართველოს ოკუპირებული რეგიონების რუსეთის ფედერაციის სამხედრო სისტემაში ინტეგრაციის გზით, მოსკოვი უხეშად არღვევს ევროკავშირის შუამავლობით 2008 წლის 12 აგვისტოს დადებულ ცეცხლის შეწყვეტის შეთანხმებას.

უწყება შემაშფოთებელს უწოდებს იმ ფაქტს, რომ რუსეთის ფედერაცია კვლავ უარს აცხადებს, აიღოს და შეასრულოს ვალდებულება ძალის არგამოყენების შესახებ.

"მსგავსი პროვოკაციული ნაბიჯებით რუსეთის ფედერაცია ცდილობს, ხელი შეუშალოს კონფლიქტის მშვიდობიან დარეგულირებას და ჟენევის საერთაშორისო მოლაპარაკებებში პროგრესის მიღწევას. მეტიც, რუსეთის ქმედებები ზიანს აყენებს ევროპის უსაფრთხოების არქიტექტურას და მიმართულია მთელს რეგიონში ვითარების დესტაბილიზაციისაკენ", ნათქვამია საგარეო საქმეთა სამინისტროს განცხადებაში.

საქართველოს დიპლომატიური უწყება მოუწოდებს რუსეთს, შეწყვიტოს პროვოკაციები, შეასრულოს თავისი საერთაშორისო ვალდებულებები.

ასევე, მიმართავს საერთაშორისო თანამეგობრობას, სათანადოდ შეაფასოს რუსეთის შორს მიმავალი აგრესიული პოლიტიკა და ქმედითი ზომები მიიღოს.

გასული წლის მარტში, რუსეთის პრეზიდენტმა ვლადიმერ პუტინმა დაამტკიცა ბრძანებულება, რომლის მიხედვითაც საქართველოს ოკუპირებული რეგიონის, დე-ფაქტო სამხრეთ ოსეთის, ჯარის ნაწილი რუსეთის არმიას შეუერთდება.

რუსეთმა 2008 წლის აგვისტოს ომის შემდეგ, ცხინვალის რეგიონი დამოუკიდებელ სახელმწიფოდ გამოაცხადა. საერთაშორისო საზოგადოება დე-ფაქტო სამხრეთ ოსეთის რესპუბლიკის დამოუკიდებლობას არ ცნობს და მოუწოდებს რუსეთის ფედერაციას, რომ მისმა ჯარებმა საქართველოს ოკუპირებული ტერიტორიები დატოვონ.