თეთრი სახლის ექიმმა რონი ჯექსონმა განაცხადა, რომ სამედიცინო შემოწმების შედეგად დადგინდა, რომ დონალდ ტრამპი აბსოლუტურად ჯანმრთელია და მისი გონებრივი შესაძლებლობები ნორმაშია. ჯექსონი ტრამპის პირადი ექიმიცაა, რომელიც მანამდე ბარაკ ობამას ექიმიც იყო.

"მის გონებრივ შესაძლებლობებზე ან ნევროლოგიურ ფუნქციებზე კითხვები არ მაქვს".

წინა კვირას აშშ-ის 71 წლის პრეზიდენტმა, დონალდ ტრამპმა სამსაათიანი სრული სამედიცინო გამოკვლევა ჩაიტარა. პრეზიდენტად არჩევიდან ეს მისი პირველი შემოწმებაა.

ეს მოხდა მალევე მას შემდეგ, რაც გამოქვეყნდა მაიკლ ვულფის წიგნი "ცეცხლი და გაბრაზება: ტრამპის თეთრის სახლის კორიდორებში", რომელშიც პრეზიდენტის ფსიქიკური მდგომარეობა ეჭვქვეშაა დაყენებული.

თეთრი სახლის ექიმმა ბრიფინგისას განაცხადა, რომ ტრამპის ჯანმრთელობა დამაკმაყოფილებელია და საპრეზიდენტოს ვადის პერიოდშიც ასე იქნება. მანვე აღნიშნა, რომ პრეზიდენტს ნაკლები ცხიმების შემცველი დიეტა და ვარჯიში წაადგება.

დონალდ ტრამპის სამედიცინო შემოწმება პარასკევს მერილენდში სამხედრო ექიმებმა ჩაუტარეს.