შინაგან საქმეთა სამინისტრო კლუბ ბასიანთან მომხდარ ინციდენტზე განცხადებას ავრცელებს. უწყების ცნობით დაზარალებულთა უფლებების დასაცავად სამართალდამცავმა ორგანოებმა კანონმდებლობით განსაზღვრული ყველა საშუალება გამოიყენეს :

"საგულისხმოა, რომ შინაგან საქმეთა სამინისტროს თანამშრომელი დაიჭრა სამსახურებრივი მოვალეობის შესრულებისას, კერძოდ, მაშინ, როდესაც თავდასხმის დროს კლუბის ორ თანამშრომელს იცავდა.

ჩვენ შესაბამის რეაგირებას ვახდენთ ძალადობის ყველა ფაქტზე. შესაბამისად, კანონით ჩვენს ხელთ არსებულ ყველა შესაძლებლობას გამოვიყენებთ დაზარალებულების, მათ შორის, იმ ადამიანების დასაცავად, ვინც უშუალოდ ზრუნავს ჩვენს უსაფრთხოებაზე. ბრალდებულის დაკავება მოხდა დანაშაულის ადგილზე. მას ბრალი წარედგინა საქართველოს სისხლის სამართლის კოდექსის სამი მუხლით. პროკურატურამ აღკვეთის ღონისძიების სახით მოითხოვა პატიმრობა და თბილისის საქალაქო სასამართლოს გადაწყვეტილება, გირაოს გამოყენების შესახებ, სააპელაციო სასამართლოში გაასაჩივრა. სამართალდამცავმა ორგანოებმა გამოიყენეს კანონმდებლობით განსაზღვრული ყველა საშუალება."

შინაგან საქმეთა სამინისტროს განცხადებით ძალადობის ყველა ფაქტზე მოხდება შესაბამისი რეაგირება, განურჩევლად იმისა ვინ არის ბრალდებული პირი, კანონის წინაშე ყველა თანაბრად აგებს პასუხს.

ინციდენტი კლუბ ბასიანთან 13 იანვარს მოხდა. ბრალდებულმა დაცვის ორი თანამშრომელი და სამართალდამცავი დაჭრა. ბრალდებული თბილისის საქალაქო სასამართლომ 30 ათას ლარიანი გირაოს სანაცვლოდ გაათავისუფლა. პროკურატურა პირისთვის აღკვეთის ღონისძიებად პატიმრობას ითხოვდა და საჩივრით სააპელაციო სასამართლოს მიმართა.

გამოძიება სისხლის სამართლის კოდექსის 117-ე, 118-ე და 353-ე მუხლებით მიმდინარეობს, რაც ჯანმრთელობის განზრახ მძიმე დაზიანებას, ჯანმრთელობის განზრახ ნაკლებად მძიმე დაზიანებასა და საზოგადოებრივი წესრიგის დამცველისთვის წინააღმდეგობის გაწევას გულისხმობს.