საქართველოს პროკურატურაში აცხადებენ, რომ თბილისში, ნუცუბიძის ფერდობზე, დაკავების დროს პაატა პავლიაშვილის გარდაცვალებაში პოლიციის თანამშრომლები დამნაშავეები არ არიან. ასე დაასრულა პროკურატურამ სიცოცხლის გაუფრთხილებლობით მოსპობის საქმეზე დაწყებული გამოძიება.

პროკურატურის განმარტებით, თვითმხილველ მოწმეთა ჩვენებებით დაადგინეს, რომ საპატრულო პოლიციის თანამშრომლებმა პაატა პავლიაშვილზე არც იძალადეს და ხელბორკილი ახსნეს დაუყოვნებლივ, როგორც კი თავი შეუძლოდ იგრძნო.

25 ოქტომბერს, საღამოს, თბილისში, ნუცუბიძის პლატოზე, მოქალაქეებმა მეზობლური კონფლიქტის გამო საპატრულო პოლიცია გამოიძახეს. უწყების ცნობით, პატრულ-ინსპექტორებმა კონფლიქტი განმუხტეს და მალევე მათთან არაფხიზელ მდგომარეობაში მყოფი ახალგაზრდა მივიდა. შსს-ს მტკიცებით, კაცი განსაკუთრებული აგრესიით გამოირჩეოდა და შეურაცხყოფას აყენებდა მოქალაქეს, რომელმაც საპატრულო პოლიცია გამოიძახა, ასევე, გარშემო მყოფ პირებს და საპატრულო პოლიციის თანამშრომლებს.

შინაგან საქმეთა სამინისტროს ცნობით, ადმინისტრაციული წესით დაკავების დროს, კაცი "უეცრად შეუძლოდ გახდა" და გარდაიცვალა. უწყების პრესსამსახურის უფროსი აცხადებს, რომ პირის გარდაცვალებაში პოლიციელების ბრალეულობა კატეგორიულად გამორიცხულია.