საქართველოს შინაგან საქმეთა სამინისტროს ინფორმაციით, დააკავეს პირი, რომელსაც ბრალად ედება ყოფილი ცოლისა და მისი მეგობრის განზრახ მძიმე დაზიანებება. ტელეკომპანია რუსთავი 2-ის ინფორმაციით, 32 წლის ქალს ყოფილმა ქმარმა 14 ჭრილობა მიაყენა.

"გამოძიებამ დაადგინა, რომ ბრალდებულმა თბილისში, წმინდა ბარბარეს უბანში, ყოფილ მეუღლეს -1986 წელს დაბადებული ფ.ფ.-ს და მის მეგობარს - 1981 წელს დაბადებულ გ.დ.-ს, დროებით საცხოვრებელ სახლში, ურთიერთშელაპარაკების ნიადაგზე, ცივი იარაღით რამდენიმე ჭრილობა მიაყენა და შემთხვევის ადგილიდან მიიმალა", - ვკითხულობთ შსს-ს განცხადებაში.

უწყებაში ამბობენ, რომ დაკავებული დანაშაულს აღიარებს.

საქმეზე გამოძიება სისხლის სამართლის კოდექსის 11-პრიმა-117-ე მუხლითა და 117-ე მუხლის პირველი ნაწილით მიმდინარეობს. დანაშაულის დადასტურების შემთხვევაში პირს სამიდან ექვს წლამდე პატიმრობა ემუქრება.