აშშ-ს პრეზიდენტი დონალდ ტრამპი ამბობს, რომ მას შეუძლია ოპრა უინფრი საპრეზიდენტო არჩევნებში დაამარცხოს. თუმცა, ეჭვი ეპარება, რომ ამერიკელმა ტელეწამყვანმა კენჭი იყაროს. ამის შესახებ, მან დღეს, 9 იანვარს, თეთრ სახლში კანონმდებლებთან შეხვედრისას ჟურნალისტის კითხვის საპასუხოდ განაცხადა.

"ოპრა ძალიან სახალისო იქნება",- ამბობს ტრამპი და ამატებს, რომ ის მის ერთ-ერთ ბოლო შოუსაც კი სტუმრობდა:

"მე მომწონს ოპრა, არამგონია, რომ მან კენჭი იყაროს".

ოქროს გლობისზე ოპრა უინფრის სიტყვით გამოსვლა საყოველთაო განხილვის თემა გახდა. უინფრი ბევერლი ჰილტონის სცენიდან საკუთარ გამოცდილებაზე, რასიზმსა და ქალთა უფლებებზე ღიად ლაპარაკობდა, რაც მილიონობით ამერიკელისთვის ინსპირაციის წყაროდ იქცა.

სიტყვა, რომლითაც უინფრიმ იქ დამსწრე საზოგადოებას და მაყურებელს მიმართა, ტვიტეტზე მალევე აიტაცეს და გაჩნდა მოთხოვნა, რომ 2020 წელს მან პრეზიდენტობისთვის უნდა იბრძოლოს.

აშშ-ს ერთ-ერთი ყველაზე გავლენიანი და მდიდარი ქალის, ოპრა უინფრის საპრეზიდენტო არჩევნებში მონაწილეობაზე საუბარი ჯერ კიდევ გასული წლის მარტში დაიწყო.