SkySports-ის ინფორმაციით, ლივერპულმა და ბარსელონამ ფილიპე კოუტინიოს ტრანსფერის დეტალები შეათანხმეს. ტრანსფერი, სავარაუდოდ, რამდენიმე საათში ოფიციალურად დადასტურდება. ბარსელონამ კოუტინიო 145 მილიონი ფუნტ-სტერლინგის სანაცვლოდ გადაიბირა.

კოუტინიოს ყიდვას ბარსელონა დიდი ხანია ცდილობს. სატრანსფერო საგა ჯერ კიდევ ზაფხულში დაიწყო, თუმცა კატალონიურმა კლუბმა ბრაზილიელი ნახევარმცველის ყიდვა ვერ მოახერხა. ზამთრის სატრანსფერო ფანჯრისთვის მზადება კი, ბარსელონამ რამდენიმე კვირის წინ დაიწყო და ინგლისურ კლუბთან მოლაპარაკებები გამართა. როგორც ჩანს, კონტრაქტის პირობები და სატრანსფერო თანხა შეთანხმებულია და კოუტინიო ბარსელონას ფეხბურთელი გახდება.

ბრიტანული პრესის ცნობით, ფილიპე კოუტინიო ბარსელონაში მოლაპარაკებების დასრულებისთანავე გაფრინდება, ხოლო სამედიცინო შემოწმებას ორშაბათს გაივლის.

ლივერპულმა ბრაზილიელი ნახევარმცველი 2013 წელს მილანის ინტერიდან 8,5 მილიონ ფუნტ-სტერლინგად შეიძინა. კოუტინიოს ლივერპულის შემადგენლობაში 200-ზე მეტ მატჩში 54 გოლი აქვს გატანილი.