ირანის რევოლუციური გვარდიის მეთაურმა, მოჰამად ალი ჯაფარმა მედიას განუცხადა, რომ ირანში აჯანყების მცდელობა ჩახშობილია. მასობრივი ანტისახელისუფლებო საპროტესტო აქციების შედეგად, რომელიც 2017 წლის დეკემბრის ბოლოს დაიწყო, დაიღუპა 21 ადამიანი, ასეულობით კი დაპატიმრებულია.

გენერალ ჯაფარის თქმით, "მტრების მარცხი" ხალხის სიფხიზლემ გამოიწვია. ანტისახელისუფლებო დემონსტრაციების პარალელურად, ირანის მასშტაბით აქტიურად გამოვიდნენ ხელისუფლების მომხრეებიც. საპრტოტესტო აქციები ირანში გაზრდილი ფასებისა და კორუფციის მაღალი დონის გამო დაიწყო, რამაც მასობრივი არეულობის სახე მიიღო.

როგორც ირანელმა გენერალმა თქვა, ქვეყანაში ანარქია და არეულობა პრო-მონარქისტული ძალებისა და აშშ-ს ყოფილი სახელმწიფო მდივნის, ჰილარი კლინტონის წახალისებით მოხდა. გენერალ ჯაფარიმდე, ირანში დაწყებული არეულობა გარეშე მტრებს დააბრალა ქვეყნის სულიერმა ლიდერმა აიათოლა ალი ხამენეიმ.

ირანში ხელისუფლების მოწინაღმდეგეებს მხარდაჭერა გამოუცხადა ამერიკის შეერთებულმა შტატებმა.

მიუხედავად გენერლის მტკიცებისა, რომ აქციები შეწყვეტილია, ვრცელდება არაერთი დაუდასტურებელი ცნობა, რომ ანტისახელისუფლებო გამოსვლები ამ დრომდე არ დასრულებულა.

უფრო მეტი ირანში მიმდინარე პროცესების შესახებ, წაიკითხეთ აქ.