ტელეკომპანია ABC-ის გადაცემა დილა მშვიდობისა ამერიკას ეთერში, არხის კორესპონდენტმა, მწერალმა და ანალიტიკოსმა ნეიტ სილვერმა განაცხადა, რომ 2016 წლის აშშ-ს საპრეზიდენტო არჩევნებში ჰილარი კლინტონის გამარჯვების შანსი 78 პროცენტია, ხოლო დონალდ ტრამპის - 20%.

აღნიშნული რიცხვები FiveThirtyEight-ს სტატისტიკურ პროგნოზს ასახავს.

"მთავარ არჩევნებამდე ორივე კანდიდატს კიდევ ბევრი რამ აქვს შესასრულებელი, თუმცა ჰილარი თითქმის ყველა გამოკითხვაში უპირობო ლიდერია" - თქვა სილვერმა.

FiveThirtyEight არის ვებსაიტი, რომელიც ფოკუსირებულია გამოკითხვების, სპორტის, პოლიტიკისა და ეკონომიკის ანალიზზე. ის 2008 წელს ნეიტ სილვერმა ჩამოაყალიბა და ხშირად მოიხსენიებენ როგორც 538-ს.

538-ს 2010 წელს ლიცენზია მიანიჭა ნიუ-იორკ ტაიმსმა, ხოლო 2013 წელს საიტი ამერიკულმა არხმა ESPN-მა იყიდა და მას ახალი რუბრიკები დაამატა, ამის შემდეგ ნეიტ სილვერი FiveThirtyEight-ის მთავარი რედაქტორი გახდა.