ფეისბუკმა და ინსტაგრამმა ჩეჩნეთის ლიდერის, რამზან კადიროვი ანგარიშები დაბლოკა. მისი ანგარიშები, რომლებსაც ოთხ მილიონზე მეტი გამომწერი ჰყავდა, 23 დეკემბრიდან აღარ ფუნქციონირებს. როგორც სოციალური ქსელის ხელმძღვანელები განმარტავენ, ანგარიშების დაბლოკვა კადიროვის მაგნიტსკის სიაში მოხვედრას უკავშირდება.

"ჩვენთვის ცნობილი გახდა და ვადასტურებთ, რომ ანგარიშები ეკუთვნოდა იმ პირს, რომელიც განსაკუთრებულ მოქალაქეთა სიაშია და აშშ-ში მისი ყოფნა აკრძალულია და მასზე სავაჭრო-ეკონომიკური სანქციები ვრცელდება. ამიტომაც, ფეისბუკს აქვს იურიდიული პასუხისმგებლობა, რომ ასეთი ადამიანის ანგარიშები დაბლოკოს", - განაცხადა ფეისბუკის წარმომადგენელმა.

რამზან კადიროვმა ტელეგრამზე დაწერა, რომ მისი ვარაუდით, ეს აშშ-ის მთავრობის განკარგულების საფუძველზე მოხდა. მისივე თქმით, მას ისედაც დიდი ხანია უნდოდა ფეისბუკისა და ინსტაგრამის დატოვება, თუმცა მეგობრებისა და გამომწერების ერიდებოდა.

კადიროვის განმარტებითმ, ის ჩეჩნეთში შექმნილი Mylistory-ის გამოიყენებს, რომელიც მომავალი წლის დასაწყისიდან ამოქმედდება. მისი ანგარიშები აქტიურია ტვიტერზე, ვკონტაკტეში და ტელეგრამზე.