შინაგან საქმეთა სამინისტროს განცხადებით, 22 დეკემბერს, დილის რვა საათიდან, დანაშაულის პრევენციის მიზნით, საქართველოს სხვადასხვა რეგიონში ჩატარებული ოპერაციისას 10 პირი დააკავეს, რომელთაგან 6 წარსულში ნასამართლევია.

შსს-ს ცნობით, დაკავებულების საცხოვრებელი სახლების ჩხრეკისას ამოღებულია შემდეგი სახის ცეცხლსასროლი იარაღი და საბრძოლო მასალა:

  • 1 ავტომატი;
  • 6 პისტოლეტი;
  • 7 სანადირო თოფი;
  • 3 შაშხანა;
  • 2 გადაჭრილი სანადირო თოფი;
  • 1 „საიგას“ ტიპის ცეცხლსასროლი იარაღი;
  • 2 ხელყუმბარა;
  • 4 კოჭა ტროტილი;
  • 1 ცეცხლგამტარი ზონარი;
  • 1095 სხვადასხვა კალიბრის საბრძოლო ვაზნა.

უწყების განცხადებით, სამართალდამცავებმა ასევე ამოიღეს ნარკოტიკული საშუალებები, 7 შეკვრა ჰეროინი და 20 გრამამდე გახსნილი სითხე.

შინაგან საქმეთა სამინისტრომ, პრევენციის მიზნით დაიწყო საპოლიციო კონტროლის განხორციელება საქართველოს ყველა რეგიონში, მათ შორის, თბილისში.

"ამ ეტაპზე, ნარკოტიკების უკანონო შეძენა-შენახვის ბრალდებით დაკავებულია 6 პირი, ასევე, დაკავებულია 2 ძებნილი, ამოღებულია სხვადასხვა სახის ნარკოტიკული საშუალებები. ნებაყოფლობით ჩაბარებულია ცეცხლსასროლი იარაღი, 12 ხელყუმბარა, 12 კაფსულ-დეტონატორი და 1124 ცალი საბრძოლო ვაზნა. გამოვლინდა ადმინისტრაციული სამართალდარღვევის 17 ფაქტი, კერძოდ, ცივი იარაღის უკანონო ტარება,"- ნათქვამია შსს-ს განცხადებაში.