მწერლების, გამომცემლებისა და მთარგმნელების კულტურის მინისტრთან, მიხეილ გიორგაძესთან შეხვედრა დასრულდა.

შეხვედრის შემდეგ მინისტრმა განაცხადა, რომ ორშაბათს, სამუშაო შეხვედრაზე გადაწყდება პროექტში მონაწილე ყველა მხარის ფუნქციები და მოვალეობები.

მან ასევე აღნიშნა, რომ შეხვედრაზე მანანა ბერიკაშვილმა "ემოციურ ფონზე" განაცხადა პროექტის დატოვების შესახებ, თუმცა მინისტრი ამ ფაქტს გამორიცხავს და "მისთვის წარმოუდგენელს" უწოდებს:

"ქალბატონი მანანას გაჟღერებული გადაწყვეტილება ემოციურ ფონზე იყო, მისი პროექტიდან გასვლა ჩემთვის წარმოუდგენელია. ის ძალიან ბევრ მიმართულებაში პირადად არის ჩართული, ძალიან მასშტაბური კულტურული პროგრამაა. ფრანკფურტის წიგნის ბაზრობაზე სპეციალური საპატიო სტუმრის სტატუსით წარდგენა ნიშნავს ქვეყნის კულტურის, მისი ისტორიის წარმოჩენას".

მანამდე, მწერალმა ლაშა ბუღაძემ ჟურნალისტებს განუცხადა, რომ მანანა ბერიკაშვილი გავიდა პროექტიდან და რომ მან ეს თავადვე განაცხადა შეხვედრისას. ბუღაძის ინფორმაციით, ბერიკაშცილი აღარ უხელმძღვანელებს ფრანკფურტის წიგნის ბაზრობას:

"ეროვნული ცენტრის წიგნი გააგრძელებს მუშაობას. დიდი მადლობა ქალბატონ მანანას ასეთი ღირსეული ნაბიჯისთვის. იმისათვის, რომ არ შეიქმნას, თუნდაც ფსიქოლოგიური თვალსაზრისით პრობლემა, ის გადის პროექტიდან".

გამომცემელთა ასოციაციის თავმჯდომარემ, გვანცა ჯობავამ აღნიშნა, რომ მათი ბოიკოტი იხსნება და მწერლებიც და გამომცემლებიც მონაწილეობას მიიღებენ ფრანკფურტის წიგნის ბაზრობაში:

"მინისტრი დაგვპირდა, რომ გამოინახება საშუალებები რომ ქართული წიგნის ეროვნულ ცენტრთან გაგრძელდეს თანამშრომლობა. მომავალ კვირაში გაიმართება პირველი სამუშაო შეხვედრა. ჩვენც აუცილებლად დავესწრებით ამ შეხვედრას".

ფრანკფურტის წიგნის ბაზრობამდე ათი თვით ადრე ქართული წიგნის ერონვული ცენტრის დირექტორმა, დეა მეტრეველმა თანამდებობის დატოვების წერილით კულტურის მინისტრს, მიხეილ გიორგაძეს მიმართა. მიზეზად კი, პროექტის დაწყებამდე რამდენიმე კვირით ადრე, ბაზრობისთვის მოსამზადებელ სამუშაო ჯგუფის მენეჯმენტში განხორციელებულ ცვლილებებს ასახელებს.

პროგრამის კურატორად დაინიშნა მინისტრის მოადგილე, მანანა ბერიკაშვილი და კომისრად სალომე ზურაბიშვილი, რომელიც ფრანკფურტში რეპრეზენტატორი იქნება.

როგორც რუსთავი 2-თან ინტერვიუში მიხეილ გიორგაძემ თქვა, ფრანკფურტის პროექტის ხელმძღვანელი იქნება მანანა ბერიკაშვილი, რომელიც ყველა სამუშაო პროცესს გაუწევდა კოორდინირებს.

2018 წელს ფრანკფურტის წიგნის ბაზრობაზე საქართველოს საპატიო სტუმარი ქვეყნის სტატუსით წარდგება.