შინაგან საქმეთა ახალი მინისტრი, გიორგი გახარია მიიჩნევს, რომ საზოგადოება მძიმე ნარკოტიკების დეკრიმინალიზაციისთვის მზად არ არის. მისი თქმით, სამინისტროს ერთ-ერთი ძირითადი ფუნქცია ნარკოდანაშაულთან ბრძოლაა და გახარია ვერ ხედავს, მაგალითად, სად გადის ზღვარი მოხმარებასა და მოხმარების წახალისებას შორის:

"ეს არ არის ის საკითხი, რომელიც შეიძლება ასე სწრაფად იყოს მიღებული, რამეთუ ეხება საზოგადოებას, მისი უსაფრთხოების, მისი ჰუმანურობის ნაწილსაც, თუმცა ჰუმანურობის ნაწილში დარწმუნებული ვართ, რომ მოვილაპარაკებთ."

გახარიას თქმით, მარიხუანას დეკრიმინალიზაციაზე საკონსტიტუციო სასამართლოს გადაწყვეტილების გათვალისწინებით, არის საკითხები, რომლებზეც ის მზადაა მოლაპარაკებებისთვის. ასეთია, ადამაიანის თავისუფლების აღკვეთის ვადები და შეუსაბამო სასჯელი, ნარკოტიკის მოხმარების შემოწმების ფორმები, რაც მისივე შეფასებით არაადეკვატურია:

"ჩვენი ამოცანა უნდა იყოს, რომ საკონსტიტუციო სასამართლოს გადაწყვეტილების იმპლემენტაციის პერიოდში არ გაგვექცეს ჯანსაღი ცხოვრების მნიშვნელობაზე აქცენტის გაკეთება, განსაკუთრებით ახალგაზრდების კომპონენტში."

რამდენიმე თვეა პარლამენტში დარეგისტრირებულია კანონპროექტი ნარკოტიკების დეკრიმინალიზაციის შესახებ. პარალელურად, კანონპროექტის დაჩქარებული განხილვის მოთხოვნით, საპატიმროებში ნარკოდანაშაულისთვის მსჯავრდებული 2 ადამიანი შიმშილობს.

რაც შეეხება მარიხუანას, საკონსტიტუციო სასამართლომ არაკონსტიტუციურად მიიჩნია სისხლის სამართლებრივი დევნა მარიხუანის მოხმარებისთვის. გადაწყვეტილებაში სასამართლომ აღნიშნა, რომ პირის უფლებაა თავად შეარჩიოს განტვირთვის მისთვის სასურველი სახე და განახორციელოს შესაბამისი აქტივობა, მათ შორის, მოიხმაროს მარიხუანა და ეს არის პიროვნების პირადი ავტონომიით დაცული სფერო.