თბილისში, ვადების მოედანზე, ნარკოპოლიტიკის შეცვლის აქციის პარალელურად სასულიერო პირების ნაწილი კონტრაქციას მართავენ. On.ge-ს სურდა მათი არგუმენტები მიეწოდებინა მკითხველისთვის, თუმცა მათ საუბარი არ ისურვეს.

სასულიერო პირებს უჭირავთ წარწერები: "ნარკომანია - გზა ჯოჯოხეთისკენ"; "ნარკომანია სიკვდილია"; "NO Drugs".

ამავდროულად რამდენიმე ასეული ადამიანია შეკრებილი იმ აქციაზე, რომელიც საქართველოში ნარკოპოლიტიკის შესაცვლელად იმართება. აქცია - "ხმაური გამარჯვებისთვის" - თეთრი ხმაურის მოძრაობის ორგანიზებით იმართება. მათ სურთ სახელმწიფომ ნარკოპოლიტიკის მიმართ მიდგომა შეცვალოს და საქართველოს პარლამენტმა წარდგენილი კანონპროექტი უცვლელი სახით მიიღოს.

30 ნოემბერს საქართველოს საკონსტიტუციო სასამართლომ ახალი გადაწყვეტილება მიიღო, რომლის მიხედვითაც, პირს მარიხუანის მოხმარებისთვის სისხლისსამართლებრივი პასუხისმგებლობა აღარ დაეკისრება.