პრემიერმინისტრი, გიორგი კვირიკაშვილი მიიჩნევს, რომ გადაწყვეტილება, რომელიც გუშინ თავდაცვის მინისტრმა მიიღო პრესკონფერენციებსა და ბრიფინგებზე არ უნდა იღებდნენ. მისი განმარტებით, ასეთი გადაწყვეტილების მიღებისას აუცილებელია უწყებათაშორისი ტექნიკური მომზადება:

"თინას მხრიდან არის ცოტა არასწორი ინტერპრეტაცია, იყო რა თქმა უნდა, მიმართულება შეთანხმებული, ეს იყო სააკაშვილის დროს მიღებული მიმართულება, რომ საქართველოში, შემდეგ უკვე იმპლემენტაციის გეგმის თანახმად, უნდა გაუქმდეს საყოველთაო გაწვევა".

პრემიერმა ასევე განმარტა, რომ ასეთი გადაწყვეტილებები არის მრავალგანზომილებიანი და ის მოიცავს არა ერთი უწყების ჩართულობას, როგორიც არის რეგიონული განვითარებისა და ინფრასტრუქტურის სამინისტრო. ამასთან, მისი თქმით, აღნიშნული ფინანსებთანაც არის კავშირში:

"ეს გადაწყვეტილებები, რომ ზოგადად ჩვენ მივდივართ ამ მიმართულებით ცნობილია, მაგრამ კიდევ ერთხელ ვამბობ, ასეთი გადაწყვეტილებები არ მიიღება, პრესკონფერენციებზე თუ პრეს ბრიფინგებზე".

პრემიერმინისტრმა გუშინ ასევე აღნიშნა, რომ საკითხი მთავრობამ და უშიშროების საბჭომაც უნდა განიხილონ.

გუშინ თინა ხიდაშელმა მედიასთან გამართულ შეხვედრაზე ხელი იმ გადაწყვეტილებას მოაწერა, რომლის თანახმადაც, თავდაცვის სამინისტრო სავალდებულო სამხედრო სამსახურში მოქალაქეებს აღარ გაიწვევს.

თუმცა, როგორც On.ge-ს თავდაცვის სამინისტროში განუმარტეს, აღნიშნული ცვლილება სამხედრო მოსამსახურეთა მხოლოდ იმ 25%-ს შეეხება, რომლებსაც სწორედ ეს უწყება იწვევდა ჯარში, დანარჩენ 75%-ს კი, რომელსაც შსს და სასჯელაღსრულების დეპარტამენტი იწვევს, ცვლილებები არ შეეხება.