"შს მინისტრთან შევთანხმდით, რომ დანაშაულის პრევენციისთვის სამინისტროების თანამშრომლობის გაღრმავება აუცილებელია",- დღეს, 4 დეკემბერს, განათლების მინისტრმა მიხეილ ჩხენკელმა არასრულწლოვანთა დანაშაულის წინააღმდეგ, სამინისტროების მიერ შემუშავებული სტრატეგია მედიას გააცნო.

"ჩვენმა ძალისხმევამ უკლებლივ ყველა სკოლა უნდა მოიცვას. ეს ამოცანა ყველა სახელმწიფო უწყების, არასამთავრობო ორგანზიაციების, მედიის, და ასევე საერთაშორისო გამოცდილების გამოყენებას მოითხოვს".

მინისტრის განცხადებით, შეიქმნება უწყებათაშორისი სამუშაო ჯგუფი, რომელიც პრევენციის კონკრეტულ გეგმასა და პროცესს სრულ კოორდინაციას გაუწევს.

მისივე თქმით, სამუშაო ჯგუფის საქმიანობაში აქტიურად ჩაერთვებიან იმ სახელმწიფო უწყებების სარასამთავრობოების წარმომადგენლები, რომლებიც არასრულწლოვანთა მართლმსაჯულების სფეროში მუშაობენ.

სამინისტროს სტრატეგია იქნება შემდეგი:

  • მანდატურის სამსახურის როლი გაძლიერდება;
  • მანდატურის სამსახურისა და სამართალდამცავ უწყებებს შორის კოორდინირებული მოქმედება;
  • საწყის ეტაპზე სკოლების უსაფრთხოების მონიტორინგში ჩაერთვება საპატრულო პოლიცია;
  • გააქტიურდება მუშაობა სკოლებში პრევენციული საგანმანათლებლო და საინფორნაციო აქტივობების, საზოგადოებრივი წესრიგისა და სასკოლო დისციპლინის დაცვის, ბულინგისა და ძალადობის წინააღმდეგ;
  • ჯგუფი იმუშავებს არასრულწლოვნებისთვის ფსიქოლოგიური და საკონსულტაციო სერვისების უზრუნველყოფაზე;
  • დაინერგება კონფლიქტების პრევენცია მათთვის და მედიაციის პროგრამები;
  • 24-საათიან რეჟიმში იმუშავებს ფსიქოლოგიური სამსახურის ცხელი ხაზი;
  • ყველა სკოლა რომ მოიცვას, პროცესში ჩართულები იქნებიან უმაღლესი სასწავლებლების სპეცალობის მაგისტრანტები და დოქტორანტები;
  • განსაკუთრებული მნიშველობა მიენიჭება მშობლების აქტიურ მონაწილეობას ამ პროცესში - იგულისხმება მშობლების ჩართულობა სასკოლო ცხოვრებაში და მათთვის საინფორმაციო საკონსულტაციო მომსახურეობა.

პირველ დეკემბერს, თბილისში, ხორავას ქუჩაზე არასრულწლოვნებს შორის დაპირისპირების შედეგად დაჭრილი სკოლის მოსწავლე საავადმყოფოში მისვლამდე დაიღუპა. ცივი იარაღით დაჭრილი მეორე არასრულწლოვანი, მომხდარიდან მეორე დღეს საავადმყოფოში გარდაიცვალა.