თითქმის ნახევარი საუკუნის წინ მთელი ინტერნეტი 45 კომპიუტერისგან შედგებოდა, რომელთა რუკის შედგენა ხელსახოცზეც კი შეიძლებოდა.

ქვემოთ მოცემულ სურათზე არსებული კვადრატები წარმოადგენს კვანძებს, რომლებიც იყო პირველი თაობის როუტერები ARPANET-ზე - დღეისათვის ყველასათვის ნაცნობი ინტერნეტის წინაპარზე.

ფოტო: ARPA/ARPAnet Completion Report

რუკაზე ქსელი ბევრად უფრო შთამბეჭდავი ჩანს, რადგან მასზე ნაჩვენებია, რომ მაშინდელ ზოგიერთ კომპიუტერს ერთმანეთისგან კონტინენტი აშორებდა:

გალაქტიკური ქსელის კონცეფცია 1960-იანებში იოსეფ ლიკლიდერმა შექმნა, რომელიც მასაჩუსეტსის უნივერსიტეტში პროფესორი იყო. შემდეგ ამას მოჰყვა აშშ-ის თავდაცვითი პროგრამის, ARPANET-ის განვითარება. მან ისეთი დაწესებულებები დააკავშირა ერთმანეთთან, როგორებიცაა: MIT, ჰარვარდი, სტენფორდი და ნასა.

1973 წლისთვის ინტერნეტი საერთაშორისო გახდა. ერთმანეთთან დაკავშირებული იყო, მაგალითად, ლონდონი და ნორვეგია.

თავდაცვა და აკადემია

1973 წლის რუკის გამოქვეყნების შემდეგ, სოციოლოგმა ტედ ნელსონმა გამოაქვეყნა კონტრკულტურული ტექნოლოგიური მანიფესტი Computer Lib. ის აცხადებდა, რომ ჩვეულებრივ ადამიანებსაც უნდა ჰქონდეთ წვდომა კომპიუტერებთან და ქსელურ ტექნოლოგიებთან.

მან დაამკვიდრა ტერმინები ჰიპერტექსტი და ჰიპერმედია, რითაც კავშირის იდეის პოპულარიზაციას დაეხმარა.

1980-იანებში ARPANET გაიყო თავდაცვის მხარედ (MILNET) და აკადემიებისა და მკვლევრების ქსელად.

ქსელი, რომლის რუკის შედგენაც შეუძლებელია

World Wide Web პირველად 1990 წელს გამოჩნდა, ძალიან სწრაფად გაიზარდა და ბიზნესებსა და ინდივიდებში ძალიან მალე გავრცელდა. ის დეცენტრალიზებული და ღია ინტერნეტი იყო, რომელიც ქსელის ნეიტრალურობაზე იყო დაფუძნებული. ეს უკანასკნელი კი გულისხმობს, რომ ინტერნეტის პროვაიდერები და მთავრობები, რომლებიც ინტერნეტის რეგულაციას ახდენენ, თანაბრად უნდა მოეპყრონ ყველა ვებგვერდს.

აკადემიისთვის შექმნილი პატარა ქსელი მონაცემების უძირო ოკეანედ გადაიქცა. ინტერნეტის ზუსტი ზომის დადგენა ძალიან რთულია, რადგან ის ძალიან სწრაფად იზრდება ყოველ წამს და არსებობს ისეთი ვებგვერდებიც, რომელთაც ჩვეულებრივი საძიებო სისტემები ვერ აფიქსირებენ - დარქნეტი, ღრმა ვები, დამალული ინტერნეტი.

ინტერნეტის ბუნების ცვლილება

ინტერნეტის დღევანდელ ბუნებაზე, ზომასა და ხელმისაწვდომობაზე ადრეული პიონერები ვერც კი იოცნებებდნენ.

მომხმარებლების რაოდენობა მსოფლიოში 3,5 მილიარდს აჭარბებს. ინტერნეტი ამჟამად იმდენად დიდია, რომ რთულია იმის წარმოდგენა, თუ როგორი განსხვავებული იყო არც ისე დიდი ხნის წინ, შექმნის პირველი ნაბიჯებისას.