საქართველოს სახალხო დამცველი, უჩა ნანუაშვილი მიიჩნევს, რომ ბავშვის მიმართ ძალადობის პრევენციის მიმართულებით განსაკუთრებული როლი ზოგადსაგანმანათლებლო დაწესებულებებს ენიჭებათ. ასე გამოეხმაურა ნანუაშვილი არასრულწლოვნებს შორის მომხდარი ძალადობრივ ფაქტს.

ომბუდსმენს განმარტავს, რომ ზოგადსაგანმანათლებლო დაწესებულებების უმთავრესი მოვალეობა ბავშვის პიროვნული განვითარება და განათლებაა, არამხოლოდ სკოლის ტერიტორიასა და საგაკვეთილო პროცესის მიმდინარეობისას. მისივე თქმით, საგანმანათლებლო დაწესებულები როლი ბავშვის მიმართ ოჯახში თუ სხვა ფორმის ძალადობის გამოვლენის, მხარდაჭერის და შესაბამისი დახმარების აღმოჩენაშია.

"სამწუხაროდ, არასრულწლოვანი, მისი საუკეთესო ინტერესები და კეთილდღეობა სახელმწიფოს განსაკუთრებული ყურადღების მიღმაა დარჩენილი, შესაბამისად, ბავშვი კვლავ საზოგადოების ყველაზე მოწყვლადი წევრია. მაღალია ბავშვთა მიმართ ძალადობის მაჩვენებელი, ხოლო მისი პრევენციის, მსხვერპლთა დაცვისა და დახმარებისკენ მიმართული ღონისძიებები არასაკმარისია და ვერ პასუხობს არსებულ გამოწვევებს; სისტემური მიდგომის გზით უნდა შეიცვალოს საზოგადოების ცნობიერება და დამოკიდებულება",- აღნიშნავს ომბუდსმენი.

საქართველოს სახალხო დამცველის აპარატის ინფორმაციით, 2016-2017 სასწავლო წელს ზოგადსაგანმანათლებლო დაწესებულებებში ბავშვის მიმართ ძალადობის საკითხებზე მონიტორინგმა აჩვენა, რომ ბულინგი არასრულწლოვანთა შორის ურთიერთობის გავრცელებული ფორმაა, ხოლო სახელმწიფოს მხრიდან არ არსებობს ძალადობის ამ ფორმის პრევენციის ერთიანი ხედვა. აპარატში განმარტავენ, რომ დაბალია ბავშვთან მომუშავე პროფესიონალთა ცნობიერება ბავშვის მიმართ ძალადობის ფორმებისა და არსებული დაცვის მექანიზმების შესახებ.

"მნიშვნელოვანია ოჯახისა და საზოგადოების როლი ბავშვისადმი ძალადობრივი დამოკიდებულების დაძლევისა და ძალადობის პრევენციის მიმართულებით. აუცილებელია ბავშვთან საუბარი, მისი პრობლემების, მიღწევებისა თუ ყოველდღიური საქმიანობის გაცნობა, გაზიარება და თანამონაწილეობა. სამწუხაროდ, საქართველოში კვლავ პრობლემას წარმოადგენს მშობლებსა და შვილებს შორის ურთიერთობის ამგვარი ფორმების დამკვიდრება, საზოგადოება კი ხშირად თვალს ხუჭავს ბავშვის მიმართ ძალადობის ფაქტებზე", - აღნიშნულია სახალხო დამცველის განცხადებაში.

ამავე განცხადებაში ვკითხულობთ, რომ მედიასაშუალებებს განუზომელი როლი აკისრიათ ბავშვის მიმართ ძალადობის პრევენციისა და საზოგადოებაში დამკვიდრებული სტერეოტიპების შეცვლის საქმეში.

"სწორედ ამიტომ, ასეთი შემთხვევები ბავშვის საუკეთესო ინტერესებზე მორგებული მიდგომებისა და არსებული მდგომარეობის მიღმა, ზოგადი კონტექსტის მიმოხილვით უნდა გაშუქდეს, რათა ხელი შეუწყოს საზოგადოებრივი დისკურსის შექმნას", - აღნიშნავენ აპარატში.

პირველ დეკემბერს, თბილისში, ხორავას ქუჩაზე არასრულწლოვნებს შორის დაპირისპირების შედეგად დაჭრილი სკოლის მოსწავლე საავადმყოფოში მისვლამდე დაიღუპა. ცივი იარაღით დაჭრილი მეორე არასრულწლოვანი, მომხდარიდან მეორე დღეს საავადმყოფოში გარდაიცვალა.

უჩა ნანუაშვილს უფლებამოსილების ვადა რამდენიმე დღეში, 7 დეკემბერს ეწურება. ამ თანამდებობაზე პარლამენტმა ნინო ლომჯარია უკვე დაამტკიცა.