შინაგან საქმეთა სამინისტროს განცხადებით, სიღნაღში ოჯახში ძალადობის ბრალდებით 27 წლის კაცი დააკავეს.

უწყების თქმით, დაკავებულმა წნორში ურთიერთშელაპარაკებისას ცოლს სიტყვიერი და ფიზიკური შეურაცხყოფა მიაყენა. დაზარალებული ამ დროისთვის ოჯახში ძალადობის მსხვერპლთა თავშესაფარში იმყოფება. მისი ჯანმრთელობის მდგომარეობა სტაბილურია.

შსს-ს განმარტებით, მომხდარიდან რამდენიმე საათში ბრალდებული წნორში დააკავეს და ის ჩადენილ დანაშაულს აღიარებს.

გამოძიება ოჯახში ძალადობის ფაქტზე მიმდინარეობს (საქართველოს სისხლის სამართლის კოდექსის 126-ე პრიმა მუხლით), რაც ისჯება ჯარიმით ან საზოგადოებისათვის სასარგებლო შრომით ვადით 120-დან 140 საათამდე ანდა თავისუფლების აღკვეთით ვადით ერთ წლამდე.