საქართველოს ფინანსთა სამინისტროს საგამოძიებო სამსახურის განცხადებით, სამართალდამცველებმა ყალბი ფულის შენახვა-გასაღების ბრალდებით ორი პირი დააკავეს.

გამოძიების ვერსიით, ბრალდებულებმა, იმერეთის რეგიონში, ყალბი 50 და 100 ლარიანი კუპიურები გაასაღეს. საგამოძიებო მოქმედებების შედეგად, დამატებით ამოღებულია 15 ერთეული ყალბი 100 ლარიანი კუპიურა.

გამოძიება მიმდინარეობს საქართველოს სისხლის სამართლის კოდექსის 212-ე მუხლის მეორე ნაწილით, რაც სასჯელის სახით ითვალისწინებს თავისუფლების აღკვეთას 7-დან 10 წლამდე ვადით.

უწყების განცხადებით, ამ ეტაპზე, ტარდება შესაბამისი ოპერატიულ-სამძებრო ღონისძიებები დანაშაულში თანამონაწილე სხვა პირების გამოვლენა-მხილების მიზნით.