საქართველოს ახალგაზრდა იურისტთა ასოციაციის თავმჯდომარის, ანა ნაცვლიშვილის განცხადებით, სტრასბურგის ადამიანის უფლებათა სასამართლოს გადაწყვეტილება არ ამბობს, რომ მერაბიშვილი არის პოლიტიკური პატიმარი.

"პირიქით, გადაწყვეტილებაში ძალიან ცალსახად წერია, რომ განსხვავებით მისი მოსარჩელის არგუმენტისგან, რომ მისი დაკავება ემსაუხრებოდა მისი პოლიტიკური სცენიდან ჩამოყვანის მიზანს, ეს არ დასტურდება", - განაცხადა ნაცვლიშვილმა.

მისი თქმით, იქიდან გამომდინარე, რომ სასამართლომ მე-18 მუხლის დარღვევა გამოავლინა, სახელმწიფომ ამას განსაკუთრებული ყურადღება უნდა მიაქციოს:

"კონკრეტულად მანდ ითქვა, რომ მერაბიშვილის დაკავების მიზანი გარკვეული პერიოდის შემდეგ შეიცვალა, ვინაიდან ეს გამოყენებულ იქნა სხვა საქმეებზე ინფორმაციის მისაღებად".

ნაცვლიშვილი მიიჩნევს, რომ პოლიტიკურად ამ გადაწყვეტილების დაკნინება ან ზედმეტად წარმოჩენა საზოგადოების შეცდომაში შეყვანაა.

სტრასბურგის გადაწყვეტილება

სტრასბურგის ადამიანის უფლებათა ევროპული სასამართლოს დიდმა პალატამ, 17 მოსამართლის შემადგენლობით, ძალაში დატოვა პალატის გადაწყვეტილება და ვანო მერაბიშვილის საქმეზე დაადგინა ევროკონვენციის მე-18 მუხლის დარღვევა, მე-5 მუხლთან ერთად.

სტრასბურგის სასამართლოს დიდმა პალატამ საქმის განხილვა საქართველოს საჩივრის საფუძველზე დაიწყო. იუსტიციის სამინისტრომ ვანო მერაბიშვილის საქმეზე, გასულ წელს, ამავე სასამართლოს ერთ-ერთი პალატის 14 ივნისს გამოტანილი გადაწყვეტილება გაასაჩივრა.

14 ივნისს, ევროპულმა სასამართლომ დაადგინა, რომ დაირღვა ადამიანის უფლებათა კონვენციის მე-18 მუხლი, მე-5 მუხლის პირველ ნაწილთან ერთად. მერაბიშვილის იმჟამიდელი ადვოკატი, ოთო კახიძე განმარტავდა, რომ კონვენციის მე-18 მუხლს მეხუთესთან ერთად ადგენენ მაშინ, როდესაც დისკრიმინაციული მოტივით ხდება პატიმრობის შეფარდება.

ოპოზიცია და საპარლამენტო უმცირესობა ამბობს, რომ სტრასბურგის გადაწყვტილების საფუძველზე მერაბიშვილი პოლიტპატიმარია და მან საპატიმრო დაწესებულება უნდა დატოვოს.

იუსტიციის მინისტრმა თეა წულუკიანმა კი განაცხადა, რომ მერაბიშვილისთვის სამართლებრივად არაფერი შეიცვლება გარდა იმისა, რომ კომპენსაციას გადავუხდით.