მთავრობის სხდომაზე, პრემიერ-მინისტრმა გიორგი კვირიკაშვილმა განაცხადა, რომ მაქსიმალურად უნდა გამოირიცხოს კომპრომისები მშენებლობის დაგეგმარების, პროექტის დამტკიცებისა და ექსპლუატაციაში მიღების პროცესში.

"მოვუწოდებ ყველა შესაბამის ორგანოს, მაქსიმალურად გაამკაცრონ კონტროლი ამ მიმართულებით. მივესალმები, რომ თბილისის მერი უკვე გამოეხმაურა ამ საკითხს და მისი დამოკიდებულებაც აბსოლუტურად ანალოგიურია".

პრემიერის თქმით, ნებისმიერი ინვესტიცია მნიშვნელოვანია, მაგრამ ადამიანის სიცოცხლე არის უფრო მნიშვნელოვანი და მან მოუწოდა ყველა შესაბამის ორგანოს ამ მიმართულებით კონტროლი გაამკაცრონ:

"ასევე, მინდა ზურაბ ალავიძეს ვთხოვო, რეგიონებში კიდევ ერთხელ ჩავატაროთ სამუშაო კამპანია, რათა მშენებლობისა და ექსპლუატაციის მიღების პროცესში არანაირი კომპრომისი ამ მიმართულებით არ იყოს დაშვებული. აუცილებლად უნდა დავიწყოთ არსებული შენობა-ნაგებობების მონიტორინგი ან, თუ გნებავთ, აღრიცხვა ამ მიმართულებით. განსაკუთრებით ეს ეხება საბავშვო ბაღებს, სკოლებს და, რა თქმა უნდა, სასტუმროებს და ისეთ შენობებს, სადაც ერთდროულად ბევრი ადამიანი იყრის თავს".

პრემიერის განცხადებით, სამუშაოები მოკლე ვადაში უნდა შესრულდეს, რათა დადგინდეს რა არის გასაკეთებელი ამ მიმართულებით:

"მომავალი წლისთვის საგანგებო სიტუაციებისა და შესაბამისი სამსახურებისთვის 20 მილიონი ლარია გათვალისწინებული და მათი აღჭურვაც ძალიან მნიშნელოვანი იქნება, რომ ჩვენ მაქსიმალურად ეფექტური ვიყოთ ასეთ სიტუაციებში".

კვირიკაშვილის კიდევ ერთხელ შეეხო ბათუმში სასტუმრო ლეოგრანდში განვითარებულ მოვლენებს და განაცხადა, რომ ამას მოჰყვა მკაცრი რეაგირება და მიმდინარეობს გამოძიება.