აჭარის ტურიზმის დეპარტამენტის ხელმძღვანელის, სულხან ღლონტის განცხადებით, სასტუმრო ლეოგრანდმა, რომელშიც 24 ნოემბერს, ბათუმში, ხანძარი გაჩნდა 2017 წელს მათი რეკომენდაციის ნიშნანი ვერ მიიღო. ღლონტის თქმით, სასტუმრო რიგ კრიტერიუმებს არ აკმაყოფილებდა. აჭარის ტურიზმის დეპარტამენტის ხელმძღვანელის განცხადებას საზოგადოებრივი მაუწყებლის აჭარის ტელევიზია ავრცელებს.

"ვადასტურებ, რომ აჭარის ტურიზმის დეპარტამენტმა ლეოგრანდს არ მიანიჭა ხარისხის ნიშანი "რეკომენდებულია", რომელსაც ჩვენ სარეკომენდაციო ხასიათით ვანიჭებთ ხოლმე სხვადასხვა სასტუმროებს. სასტუმროს ვებგვერდზე უწერია 2016 წელს მინიჭებული ამ სტატუსის შესახებ, მაგრამ მას შემდეგ, რაც გავამკაცრეთ რეგულაციები, 2017 წელს მას ეს სტატუსი აღარ მიუღია. სტატუსის განახლება ხდება ყოველწლიურად, შესაბამისი კრიტერიუმების მიხედვით, რომელსაც კვების ან განთავსების ობიექტი უნდა აკმაყოფილებდეს. საბჭომ ჩათვალა, რომ 2017-2018 წლებისთვის, ლეოგრანდი ამ კრიტერიუმებს ვერ აკმაყოფილებდა. გვქონდა კონკრეტული კითხვები", - ამბობს აჭარის ტურიზმის დეპარტამენტის ხელმძღვანელი.

სასტუმრო ლეოგრანდში გაჩენილი ხანძრის შედეგად, გარდაცვლილია 11 ადამიანი, მათ შორის, 10 საქართველოს, ხოლო ერთი ირანის რესპუბლიკის მოქალაქე. აჭარის ტელევიზიის ინფორმაციით, გვამების ნაწილის იდენტიფიცირება უკვე დასრულებულია.

სასტუმრო ლეოგრანდში ხანძარი 24 ნოემბერს, დაახლოებით 20 საათზე გაჩნდა და ძლიერი კვამლი მალევე მოედო მთელ შენობას.