ისანში ჩატარებულ სპეცოპერაციასთან დაკავშირებით პარლამენტის თავმჯდომარე, ირაკლი კობახიძე სამართალდამცველებისგან უფრო დეტალურ ინფორმაციას ელოდება და ამბობს, რომ სწორედ ამის შემდეგ გადაწყდება, შეიქმნება თუ არა ამ თემაზე სპეციალური ფორმატი პარლამენტში:

"ჩვენ რა თქმა უნდა ველოდებით კონკრეტულ ინფორმაციას სამართალდამცველების მხრიდან. ეს არის მათი პრეროგატივა. დეტალებთან დაკავშირებით ისინი ინფორმაციას და ამის საფუძველზე შეიძლება გადაწყდეს თუ რამდენად იქნება საჭირო, მათ შორის საპარლამენტო ფორმატის გამოყენება ამ საკითხის განსახილველად. კითხვები არსებობს და ჯერჯერობით დაზუსტებული ინფორმაცია ჩვენ არ გვაქვს და ეს არის ბუნებრივი".

21-22 ნოემბრის სპეცოპერაციის შედეგად, დაიღუპა ერთი სპეცრაზმელი და დაჭრილია ოთხი სამართალდამცავი. სახელმწიფო უსაფრთხოების სამსახურის ცნობით, ლიკვიდირებულია დანაშაულებრივი ჯგუფის სამი წევრი.

სპეცოპერაციის გამო მიმდებარე ტერიტორიიდან ევაკუირებული იყო მოსახლეობა, სკოლასა და სამ ბაღში კი სასწავლო პროცესი შეწყდა. სპეცოპერაციის შესახებ არაერთი მნიშვნელოვანი დეტალი და გარემოება ამ დრომდე უცნობია.